Romero tiwala sa ilalaro ng Patriots sa pagsagupa sa Dragons

MANILA, Philippines - Kampante ang Philippine Patriots team owner na si Mikee Romero na ma­ilalabas ng kanyang koponan ang puso ng isang kampeon sa pagharap nila sa KL Dragons sa Air­Asia ASEAN Basketball League (ABL) Season 2 se­mifinals.

Ito ang ikalawang su­nod na pagkakataon na magkikita ang Patriots at Dragons sa semifinals ng ABL at gaya noong na­karaang taon ay hawak ng nagdedepensang kampeon ang homecourt advantage sa best of three series.

Pero marami ang nag­dadalawang isip kung ma­kakaya nga ng Patriots na daigin uli ang Dragons para makabalik ng Finals na kung saan ang makakalaban ay ang mananalo sa pagitan ng top team Chang Thailand Slammers at Singa­pore Slingers.

Dalawang beses sa tatlong laro hiniya ng Dra­gons ang Patriots at kanilang ni­lagyan ng tuldok ang pa­ngi­ngibabaw gamit ang 92-74 dominasyon noong Dis­yembre sa Ynares Sports Arena sa Pasig City.

“The semis series will se­parate the men from the boys,” wika ni Romero na kasama si Tony Boy C­ojuangco ang team ow­ners ng koponan.

“They have beaten us twice and they have bullied us during our game in Kuala Lumpur. Its time for the team to show how tough we are. It’s payback time for the Philippines,” dagdag pa nito.

Kumbinsido rin si coach Louie Alas na kayang bumawi ng Patriots pero dapat nilang maintindihan na hindi nila madadaan ang asam na panalo sa pag-outscore sa kalaban.

“Kailangang 40-minu­tes na depensa. Malakas ang Dragons kaya sa depensa dapat namin daanin ang laro,” wika nito.

Ang Game One ay ga­gawin sa bagong venue na Ninoy Aquino Sta­dium sa ganap na alas-4 ng ha­pon at nananalig ang pa­munuan ng Patriots na dudumugin ito ng mga Pi­noy para suportahan ang home team na nagnanais na maging kauna-unahang back to back champion sa ABL.

Ang Game Two ay iti­nakda sa Enero 26 sa MA­BA Gym sa Malaysia at kung magkakaroon ng deciding Game Three, ito’y lalaruin sa Pilipinas sa Ene­ro 30.