Guba nakasunod-sunod og daog

CEBU, Philippines - Nakahimo gihapon sa pagkulit og sunod-sunod nga daog si Arnel Guba bisan pa og lain-laing ang iyang katimbang pinaagi sa paghari sa Baseline Sinulog Dartfest diha sa Baseline Sports and Recreation Center.

Human manghawod sa 2011 sa Yayoy's Grill Sinulog Open Doubles Dartfest, si Guba, kinsa ning higayona nakigpares ni Macross Amora, nakalingkawas sa makutas nga final match batok nilang Jerome Perales ug Roniel 'Kulot' Pedrosa, 2-1, 2-1.

Sila si Perales ug Pedrosa nagbaton og "twice-to-beat" advantage, apan ang tandem nilang Guba ug Amora mipamatuod nga uhaw ug mas labing determinado nga paresan.

Sila si Toybatz Bandolon ug Neil Nacua maoy miangkon sa ikatulo nga dapit, samtang sila si Steve Montenegro ug Jomar Amerol mi-okupar sa ikaupat nga dapit.

Mipahiluna sa ikalima mao sila si Alan Bejuna ug Nilo Janson.

Mikompleto sa top 8 finishers mao sila si Boy Campugan ug Tasyo Rama, Alvin Villa ug Wennie Abella, Frank Bejec ug Oning Bacalso. - BANAT NEWS