Barrera mobawos ni Bautista

CEBU, Philippines - Mobalik dinhi sa Sugbu si Mexican featherweight Alejandro 'Zorrito' Barrera uban ang paglaum nga makabawos ni Rey 'Boom Boom' Bautista sa ilang "rematch" sa main event sa "Pinoy Pride 3" boxing card karong Enero 29 diha sa Waterfront Cebu City Hotel and Casino.

Hangtod karon, wala pa madawat ni Barrera ang nahiaguman niyang kontrobersiyal nga kapildihan gikan ni Bautista sa ilang sangka niadtong Agosto sa miaging tuig sa main event sa "Philippines vs. the World" diha gihapon sa Waterfront Hotel.

Sa una nilang panag-abot, miresulta sa usa ka "technical" decision ang maong away pabor ni Bautista   human makahiagum og dakung gisi sa kilay si Barrera. Apan kumbinsido ang kampo ni Barrera nga ang maong gisi mugna sa headbutt ug dili sa legitimate punch.

Tungod niini, sagol kapungot ang subling pakigsangka ni Barrera ngadto ni Bautista ug timaan niini ang grabe niyang ensayo didto sa Mexico.

Una nang gikataho nga nagpatabang ang kampo ni Barrera ngadto sa ilang kababayan nga si kanhi world champion Daniel Ponce De Leon aron himuong sparmate sa Mehikanong boksidor. Si De Leon maoy unang boksidor nga mipahamtang og kapildihan ni Bautista.

"No matter how hard or what training Bautista is doing, it will be of no use because I got his number now and I am going to knock him out come fight night," matud pa ni Barrera sa iyang e-mail nga gipadala niya ngadto sa ALA Promotions.

Ang Team Barrera gikatakdang moabot dinhi sa Sugbu gikan sa Mexico karong Enero 24.

Inig ka ugma, himuon ang ilang press luncheon ug sundan sa iyang public work-out diha sa Piazza area sa Park Mall. - BANAT NEWS