CEBU, Philippines - Kanunay kitang makadungog niining mga pulong "everyone is entitled to his/her own opinion."
Kung duna gani mga pormal nga tigum ilabi na sa mga dagkong kompanya, ang usa ka manager mangayo dayon sa opinion o sugyot o dili pa kumentaryo gikan sa iyang mga empleyado kay matod pa nga ang usa ka "healthy discussion" leads to progress.
Bisan asa nga meeting, aduna gyud mopadayag sa iyang kaugalingong opinion sa pamasin nga ang iyang gisugyot maoy mahimong giya sa kalamboan. Bisan gani sa among PTCA meeting sa University of San Carlos-South Campus, ang mga ginikanan libreng mopadayag sa ilang opinion ug bisan pa tingali sa atong pagtuo nga sayop, wala kita'y katungod pagpanaway kanila tungod kay managlahi man kita'g baruganan.
Nakasulti ako niini tungod sa pagpahungaw ni boxing champion Congressman Pacman (Manny Pacquiao) sa column ni Kevin Iole, usa sa labing maayo ug sikat kaayong boxing writer ug analyst sa Yahoo Sports kinsa mipakatap og artikulo nga nag-awhag sa mga boxing fans sa pag-boycott sa umaabot nga sangka nilang Pacman ug Shane Mosley karong umaabot Mayo 7 didto sa MGM Grand sa Las Vegas, Nevada.
Tungod kay iya man kadtong panahon ni Iole, alang kanako husto siya ug tungod sa iyang taas kaayong kasinatian sa natad sa boxing, duna siya'y sukaranan sa iyang opinion ug dili siya buang nga mosuwat sa maong column kung walay igong kamatuoran.
Isip usa ka Pilipino, dili ako uyon nga e-boycott sa mga fans ang away apan isip usa ka sports afficionado, uyon ako sa giingon ni Iole nga ang Pacman-Mosley bout walay lami ug dili maayong tan-awon.
Kanunay ako makabasa aning mga column ni Iole kaniadto ilabi na matag dunay away si Pacquiao ug gikan kaniya akong nabasa ang usa sa labing maayong artikulo kalabot sa boxing kung giunsa niya pagdayeg si Pacman. Gani, sa akong pagbasa nakugang ako kung nganong may suhito pa si Iole kay sa ubang mga Pinoy boxing writers.
Karon nga wala siya maka-angay sa gisulti ni Iole, mitiyabaw dayon siya nga unta mahimo man nga iya kining pablayon kay walay bisan kinsa nga tawo nga motuo kang Iole kung sa ilang pagtuo nindot gyud ang maong away.
Kitang mga Pinoy pwerteng makapanaway ni Floyd Mayweather Jr. nga banga kaayo nga boksidor. Banga siya nga boksidor apan midaog siya batok ni Mosley.
Karon nga ikasangka ni Mosley ang laing maayong boksidor sa tibuok kalibotan, unsa man kahay porsiento nga iyang madag-an nga napilde man gani siya sa banga nga si Mayweather. Beh, tug-ani kuno ako ninyo kung unsay mahitabo sa maong away.
Kung ato kining tinambanon paghatag og ehemplo, asa ka man mopusta sa duwa sa basketball, adto sa USA Dream Team o sa Angola? Ang Mayweather-Mosley bout bati? Unya unsa man ang Pacquiao-Mosley bout, nindot? Susmaryosep ninyo! Hunonga na intawon kanang inyong pagdamgo. Buang ang modapig kang Mosley ug angayan nang magpa-eksamin sa ilang utok.
Mao kini nga boxing promotion nga wala pa gani mahitabo nakahibalo na kita kinsay modaog. Gawas lang tingali ug ibaligya ni Bob Arum ang duwa aron dunay sunod. Bisan og sapian kini si Arum apan dili sab ako motuo nga dili kini siya magpaburot sa iyang bulsa.
Ang nakadaot gud ani ni Pacman karon kay 70 por siento na ang iyang pagka-politiko ug 30 por siento na lang ang iyang pagka-sportsman. Ang labing tinuod, sukad misulod sa showbiz kini si Pacman, natakdan na sab siya sa ubang mga artista nga mga "onion-skinned" o gitawag nga balat sibuyas. Kining mga matanga sa tawo ilabi na kining ubang walay gamit nga mga political leaders, dili kini sila magpasaway kay nagtuo sila nga abi kay mibotar man nila ang katawhan, sila perfecto na.
FYA OFFICERS. Ang akong higala nga si Noel Medalle mipahibalo kanako nga sugdan ang torneyo sa F. Llamas Youth Association (FYA) 3rd Conference karong ikatulong semana sa Enero ug dili na sila magduwa didto sa Vicente Sotto Memorial Gym apan mobalhin na ngadto sa sition Manggahan kay matod pa niya, naigo sa politika ang FYA.
Ang ilang mga bag-ong officers alang sa tuig 2011-2012 mao sila si Arnel Trinidad, president; Baeng Medalle, vice-president internal; Adrian Lborte, vice-president external; Tooper Marata, treasurer; Dondon Cadungog, assistant treasurer; PRO's Noel Medalle, Judon Rabadon, Victor Avila, Tonio Abella, Ranel Patalita ug Nico Laborte ug mga sakop sa board of directors nga sila si Don Robert, Michael Garcia ug Crissar Llegunas. - BANAT NEWS