Binukbukay sa I.T Park karon nang gabii

CEBU, Philippines - Subhan na ang abilidad isip pro sa tulo ka kanhi amateur standouts sa ALA Boxing gym batok sa tagsa-tagsa nila ka sangka sa pagsikad sa "ALA-Cobra Tunay na Lakas" boxing series karong gabii didto sa Asiatown I.T Park sa Brgy. Apas, ning siyudad.

Pinangulohan ni national gold medalist Albert Pagara ug nilang Boyce Sultan ug Michael Romarate, paninguhaon nila nga mokulit og daog sa labing una nilang professional bout.

Si Pagara, kinsa misunod karon sa lakang sa iyang maguwang nga si Jason Pagara, moharong ni Sandy Cajil sa Futalan Stable, samtang ang 2010 Tinga Cup silver medalist nga si Sultan moaway batok ni Justin Gacos sa DDP stable.

Mokatkat usab sa ring ang flyweight contender nga si Romarate batok ni Rando Espeleta sa Butuan City sa ilang four-rounder bout sa 112 lbs. division.

Sa main event, masaksihan ang sangka sa ALA knockout artist nga si James Bacon batok ni Jake Verano sa Cagayan De Oro, samtang si Rolando Magbanua sa Braveheart Boxing stable makigbinukbukay ni Jason Egera sa Negros Oriental.

Mokompleto sa boxing card mao ang sangka tali sa duha ka Bol-anon nga sila si Jomar Cordinillo ug Marlou Talili ug Sugbuanong si Richard Barrios batok ni Crispin Salvador sa Negros Oriental.

Sa laing bahin, si ALA Promotions president Michael Aldeguer mibutyag nga dili kini ang katapusang boxing card nga ilusad sa ALA ug Cobra Energy Drink.

"ALA and Cobra will have this partnership for two years and with this, we will be expecting more fighters fighting for our country in the future," matud pa ni Aldeguer atol sa press conference kagahapon didto sa Sports Exchange Bar and Grill.

Plano usab sa ALA Promotions ug Cobra nga himuon kini nga usa ka nationwide series diin ilakip nila ang Bacolod, Cagayan De Oro, Zamboanga, General Santos, Davao ug Boracay. (BANATSPORTS)