10 miler run sa PLDT-Smart

CEBU, Philippines - Agi'g pagpalambo sa paugnat sa kusog dinhi sa nasud, ang Philippine Long Distance Telephone Company (PDLT)-Smart Communication misulod na karon sa eksena sa running ug ilang gilusad ang "PLDT-Smart 10 Miler" nga gikatakda karong Enero 30 diha sa Cebu City Sports Center (CCSC).

Kini ang labing unang higayon nga ang usa sa mga labing dakung telecommunications company sa nasud nga gipanag-iya ni business tycoon ug sports patron Manny V. Pangilinan mopasiugda og dakung lumba dinhi sa Sugbu.

"This is part of the program of the PLDT and Smart in helping the Filipino excel in sports," matud pa ni Grace Ruperto, Trade Marketing Manager of Smart Communication, Inc. VisMin atol sa press conference kagahapon didto sa Tokyo Room sa Marco Polo Hotel.

Gawas sa 10 mile race (16K run), lakip usab sa mga kategoriya nga piliang daganan sa mga runners mao ang 10K, 5K ug 3K.

Gipaabot nga kapin sa 2,000 runners ang mosalmot niining maong lumba.

Si Raffy Uytiepo, race director ug The Freeman columnist, miingon nga nakahukom sila nga mopahigayon og usa ka 16K run aron dili mahago ang mga long-distance runners, ilabi na kadtong bag-o pa nga midagan sa 42K Cebu City Marathon.

"This race will be sort of a recovery run for those who ran in the Cebu Marathon, also a preparation for the upcoming Condora Marathon in Manila," matud pa ni Uytiepo.

Mokabat sa P50,000 ganting salapi gikan sa PLDT-Smart ang giandam alang sa mga mananaog sa matag dibisyon. Ang tanang finishers sa 16K makadawat og limited edition finisher

shirt.

Ang registration fee nagkantidad og P350 alang sa 16K, samtang P250 alang sa 10K, 5K ug 3K categories. Ang registration area nahimutang   sa Runnr sa Ayala Center-Cebu, Cebu City Sports Center, Casa Ilongga sa Robinson's Place ug Smart Experience Center sa SM City.  (BANATSPORTS)