CEBU, Philippines - Masaksihan na sa mga Sugbuanon nga mahigugmaon sa duwang volleyball sa dihang ang nga piniling mga magduduwa ang magsangka sa gikahinaman nga 1st CESAFI vs. GUV Cup All-Stars Friendship Game karong alas-6 sa gabii diha sa University of San Carlos (USC)-main gym.
Sa labing unang higayon, ang Cebu Schools Athletic Foundation Inc. (CESAFI) ug ang Governor Gwen Garcia Unity (GUV) Cup nagkahugpong nga maoy naghatag og dalan aron mahimugso ang showdown sa Cebu volleyball stars.
Ang GUV Cup mahinuon ni kanhi RP Youth member Genie Sabas, RP Team member Jusabelle Brillo, Jullett Mae Marikit, Kennette Garces, Lovena Amor Pepito, Katherine Jumapao, Rachelle Hanna Singson, Catherine Marquez, Melanie Silvestre, Gretchel Soltones, Athena Sucalit, Queenie Rivera, Christy Sucalit ug Apple Eve Saraum.
Sa habig sa CESAFI selection, langkuban nilang Princess Anne Pido, Danika Yolanda Gendrauli, Raphril Aguilar, Danalie Baquiro, Fritzie Aligway, Elizabeth Emnace, Lorie Mae Layno, Mary Luilyn Paciño, Christalie Picos, Anna Sabanal ug Rhea Loayon sa Southwestern University (SWU), Suzette Panis sa University of San Carlos (USC), Abegail Prace sa University of San Jose-Recoletos (USJ-R) ug Erika Camille Verano sa University of Southern Philippines Foundation (USPF).
Sa men's division, ang GUV Cup All-Star pangulohan ni RP Team member Jonrey Sasing uban nilang Norvie Labuga, Roderick Arenasa, Edward Carlo Tecson, Kennith Bensig, Ronald Acojedo, Ronald Moreno, Rolly Mancao, Alfred Daan, Jacky Yrog-irog, Dave Aresa, Mike Abria ug Jade Becaldo.
Samtang ang CESAFI moparada nilang Leoniel Sanchez, Loujei Tipgos, Kevin Casia, Jason Uy, Ken Bhoyd Abunda, Jayvelle Roxas ug Jan Manalili sa USJ-R, Edward Ybañez ug Allan Caspillo sa USPF, Mark Giducos sa University of the Visayas (UV) ug Dennis Sepulveda sa USC.
Si Jun San Juan, ang presidente sa Cebu Volleyball Association (CEVA) miingon nga gilauman niya nga magsugwak ang mga tawo tungod kay ang maong kalihukan libre kini sa tanan.
Si Governor Gwen Garcia motambong sa maong kalihukan uban ni CESAFI commissioner Felix 'Boy' Tiukinhoy Jr., CESAFI president Rolando Villa ug mga opisyales sa CEVA.
Ang makampiyon makadawat og tropeyo ug medalya gikan ni Philippine Volleyball Federation (PVF) president Gener Dungo. - BANAT NEWS