Canoy midaog batok Adelmita
CEBU, Philippines - Mipatigbabaw ang kusog ni light flyweight prospect Jason Canoy sa iyang pakigharong ni Noel Adelmita sa main event sa IPI Omega Boxing-Gym boxing card niadtong miaging gabii didto sa lungsod sa Borbon sa amihanang bahin sa Sugbu.
Ang walay pildeng si Canoy wala maglisud sa pagpasud sa iyang mga kinumo bisan pa sa hugot nga depensa ni Adelmita.
Sa maong kadaugan, si Canoy mihipos sa iyang ika-12 ka daog, samtang si Adelmita nakahiagum sa iyang ikaduhang pilde sud sa unom ka away.
Sa laing light flyweight bout, si Juan Purisima midaog pinaagi sa puntos batok ni Anthony Zabalde, samtang gipilde ni Virgilio Silvano si Romnick Magos pinaagi sa "unanimous decision."
Miiskor sab og daog si super bantamweight Eman Labanza batok ni Edyson Serrano ug ingon man si Aljon Sulagaol batok ni Ryan Illustrisimo, samtang si Marjun Baliguat mipilde ni Erwin Yamo.
Si Erwin Pulvera mao ang bugtong boksidor nga mi-iskor og knockout dihang iyang gitumba si Jaime Bermiso sa first round. Si Ricky Saguisa midaog batok ni JR Salvador pinaagi sa majority decision. (BANAT NEWS)
- Latest
- Trending
