CEBU, Philippines - Mapuno karon ang mga dagkung dalan sa siyudad sa Sugbu sa pagsikad sa labing dakung lumba sa dagan sa Sugbu, ang 2nd Cebu City Marathon nga manukad diha sa Asiatown IT Park sa Brgy. Apas, ning syudad.
Dul-an sa 6,500 ka runners ang magginukdanay dinhi sa Sugbu, pipila niini mga runners nga gikan pa sa silingang siyudad ug probinsiya ug ingon man ang mga langyaw nga modagan sa 42K Marathon. Gawas sa 42K, may lumba sab alang sa 21K ug 5K categories.
Masentro sa maong lumba mao ang hugot nga kompetisyon sa 42K diin ang makampiyon mobulsa og P60,000 ug mga freebies gikan sa sponsors.
Sukwahi sa unang namantala, miapas sa registration ang defending champion sa male open nga si Kenyan Willy Tanui, kinsa manalipod sa iyang titulo. Andam na usab nga manalipod sa iyang korona si Aileen Tolentino sa female class.
Modagan sab sa 42K marathon, si former Milo Marathon champion Crisenciano Sabal, ang duha sa mga elite female runners sa Sugbu nga sila si Mary Grace Delos Santos ug Mary Joy Tabal.
Lahi usab karong tuiga tungod kay subayon sa mga runners ang 600 metros nga underground tunnel sa South Road Properties. Kini lang ang ikaduhang higayon sa kasaysayan sa lumba sa dagan sa Asya nga mogamit og tunnel sunod sa nabantog nga Hong Kong Marathon.
Gawas sa especially-designed nga mango-shaped medal nga madawat sa tanang finishers sa 42K, may raffle usab nga pagahimuon human sa lumba alang sa tanang runners nga misalmot. (BANATSPORTS)