CEBU, Philippines - Mipabuhagay dayon sa ilang abilidad ang Mandaue City Team A ug Philippine Army sa pagsugod sa 1st Baybayon Open Volleyball Tournament niadtong miaging gabii diha sa Mandaue City Cultural and Sports Complex.
Lab-as pa gikan sa kampiyonato sa Governor Gwen Garcia Unity Volleyball (GUV) Cup, ang Mandaue City belles mibuntog sa Southwestern University (SWU) Lady Cobras sud sa duha ka sets, 25-19, 25-19.
Kanhi sakop sa RP Youth nga si Genie Sabas, Erika Camille Verano, Rachel Hanna Singson, Kenneth Garces, Chona Gesulga, Juriza Arofo ug Lovena Amor Pepito maoy nagda'g kusog sa kadaugan sa Mandaue.
Sa laing bahin, ang Philippine Army nga gibidahan nilang Rachelle Anne Daquis, Michelle Carolino, Joan Buna, Ers Iratay, Gonzales Divas ug De Leon milupig sa Talisay City, 25-19, 25-15.
Dali hinuon nga nakabangon ang Talisay dihang ilang gipahimungtan ang Mandaue City B, 25-17, 25-20 luyo sa bangis nga atake nilang Mechelle Matuguina, Juliet Mae Marikit, Florian Gutierrez, Ivy Abella ug Roselyn Balincasag.
Gawas sa mga tropeyo ug medalya, ang champion mobulsa og P5,000, ang second placer makadawat og P3,000, samtang ang third placer makaangkon og P2,000.
Gipaluyohan nilang Rene ug Linda Froilan, ang duha ka adlaw nga kompetisyon usa sa mga highlights sa tinuig nga kapistahan sa Baybayon sa Brgy. Looc dakbayan sa Mandaue. – BANAT NEWS