Turkey misakmit korona sa CUBA Christmas League

CEBU, Philippines - Nag-wild ang Turkey sa final period aron ilubong ang Lithuania, 101-81 ug aron usab pagsakmit sa kampiyonato   sa Cebu United Bankers Association (CUBA) Christmas Basketball League didto sa Our Lady of Sacred Heart Parish gym sa Escario Street, ning siyudad.

Unang mipabuto sa ilang opensiba ang Lithuania sa pagsugod sa duwa aron pagposte og 15 puntos nga labaw, 27-12, apan wala makupsi sa paglaum ang Turkey og misumbalik sila og puntos aron tablahon ang iskor sa halftime, 35-all.

Gikan didto nakuha sa Turkey ang momentum ug gibanatan nila ang Lithuania sa third period pinaagi sa paglusad og 35-26 rally alang sa 66-55 nga labaw paingon ngadto sa final period.

Si Richard Allera ug Bjorn Maravilla maoy leading scorers sa Turkey pinaagi sa ilang 18 puntos matag usa, samtang ang naparot nga Lithuania gipangulohan ni Eric So, kinsa miposa og 18 puntos.

Sa sayong bahin, si Robert Rafson Chua mikulit og season-high 27 puntos aron ituboy ang Serbia ngadto sa 82-76 nga kadaugan batok sa United States alang sa third place trophy.

PUNTOS MATAG USA

(For third)

Serbia (82) - Chua 27, Aparri 18, Villanueva 14, Ruiz 7, Navarro 7, Solon 5, Cataros 4

USA (76) - Ronron Yap 24, Malahay 17, Dominguez 9, Rosal 8, Ancajas 8, Daclan 3, Barrad 2, Bacalla 2, Yamyamin 2, Bernas 1

(Championship)

Turkey (101) - Allera 18, Maravilla 18, Minoza 15, Ivan 13, Minoza 10, Gabales 9, Villarin 6, Osorio 4, Aquinde 4, Libres 2, Liston 2

Lithuania (81) - Eric So 18, Roces 15, Bartolaba 14, Markussz 9, Martinez 9, Pajares 9, Ornopia 7    (BANAT NEWS)