CEBU, Philippines - Gilubong sa Lola Tikya nilang team managers Junjun Monsanto ug Roger Lee ang higpit nilang karibal Masong Bros. ni Stephen Postrero pinaagi sa pag-iskor og 71-52 aron sakmiton ang korona sa Sambag 2 Basketball Athletic Association (S2BBA) Christmas League niadtong Domingo diha sa barangay Sambag covered court.
Sa preliminary, nasakmit sa JJ-Ann ang ikatulong puwesto human usab nila gipilde ang Vikings nga gipaluyohan sa Ceres Liner, 87-75.
Nahimong sikit ang first half diin walay bisan usa sa duha ka teams ang milabaw og double figures ug natapos ang halftime sa iskor nga 43-35 pabor sa Lola Tikya.
Apan kalit lang nagmangtas ang Lola Tikya sa third period diin nagpauwan sila’g mga puntos sa pagpangulo nilang Aries Jayme ug Allan Yu nga parehong miburak og 18 puntos.
Ang pilderong Masong Bros. gipangulohan ni Michael Cruz, ang bugtong player nga mi-iskor og double figures sa iyang 12 puntos.
Sa laing duwa, ang kanhi CIT Wildcat nga si Jumel Lanutan mirehistro og game-high 30 puntos, lakip na ang siyam ka triples aron pangulohan ang JJ-Ann. Si Dennis Borinaga midugang og 20 puntos alang sa maong kadaugan.
Sila si Rey Mojado ug Nick Mejorada maoy nangu sa Vikings sa ilang 20 ug 19 puntos, matag usa.
Si Jayme maoy napiling Best Player, si Yu maoy Most Improved Player ug si Teyoy Lim maoy nakadawat sa Sportsmanship Award.
Ang mga sakop sa Mythical Five mao sila si Dodong Elizalde, Rondyll Roncal, Andy Miñoza, Lanutan ug Cruz.
Ang maong torneyo nahimong posible pinaagi sa pagpaningkamot si S2BAA chairman Bebot Ancot uban ni Elizalde (secretary), Postrero (finance officer) ug mga board members nga sila si Edwin Gabutero, Lato Belocura, Andy Auza, Jerome Tugaon, Weg Ancot, Bebe Jagmoc ug Yu.
PUNTOS MATAG USA
Unang duwa:
JJ-Ann (87) - Lanutan 30, Borenaga 20, Monternel 8, R. Aguilar 7, Sandalo 6, Bacus 6, Hilaga 6, Vargas 2, R. Vargas 2
Vikings (75) - Mojado 20, Mejorada 19, Dagatan 12, Tugaon 8, Dela Cruz 6, Abao 4, Estayan 4, Abian 2
Ikaduhang duwa:
Lola Tikya (71) - Jayme 18, Yu 18, Auza 6, Tañan 6, Nardo 6, Roncal 5, T. Lim 4, Bautista 2, De Guzman 2, Amaquin 2, C. Lim 2
Masong Bros. (52) - Cruz 12, Bagtong 7, Bajal 6, Postreros 4, Piquero 4, Dela Rosa 4, Maturan 4, Dolloso 4, Kintanar 3, Miñoza 2, Labrejos 2 (BANAT NEWS)