Lopez midominar sa 32nd Mano Amo Run
CEBU, Philippines - Giguba ni Mendel Lopez ang plano ni John Philip Duenas nga morehistro og daug sa iyang balwarte atol sa 32nd Halad Kang Mano Amo Run niadtong bisperas sa Pasko didto sa Plaza Mano Amon, syudad sa Danao.
Ang Ultra Marathon king nga si Lopez maoy nangharus sa 10k men’s open dihang iyang gitapos ang lumba sulod sa 30 minutos ug 9.56 segundos, labaw lang og pipila lang segundos sa garbo sa Danao nga si Duenas kinsa mirehistro og oras nga 30:16.18.
Migawas nga third placer ang teammate ni Lopez sa University of Southern Philippines Foundation (USPF) nga si Joel Delposo sa oras nga 30:26.10.
Sa iyang bahin, padayun nga mipakita sa iyang abilidad ang rising teen running sensation nga si Mary Joy Tabal kinsa midominar sa women’s class sa oras nga 36:29.55.
Ang top three finisher sa miaging 42k National Milo Marathon nga si Tabal mipilde sa beteranang si Christy Sevilleno-Tutor kinsa mipwesto sa ikaduhang dapit sa oras nga 37:37.39, samtang si Madelyn Carter mitugpa sa ikatulo sa oras nga 38:33.83.
Sa 10k all-Danao division, sila si Leo Abello ug Emily Rosas ang migawas nga mananaug sa tagsa-tagsa nila ka dibisyon.
Si Abello mitugpa sa unang dapit sa oras nga 35:24.22, gisundan nila ni Enrique Mangas (35:42.59) ug Ramil Lumindas (36:33.69) sa ikaduha ug ikatulong luna.
Sa iyang bahin, ang kanhi RP weightlifter nga si Rosas mao usab ang midominar sa female division sa oras nga 42:49.67. Nagsunod sa ikaduha si Josephine Damicog sa oras nga 57:25.07 ug si Aldian Villarubia mipahiluna sa ikatulo sa oras nga 59:15.660.
Ang maong lumba nga gihalad sa kasumaran sa adlaw'ng natawhan sa giilang “Amahan sa Danao” nga si Ramon “Mano Amon” Durano Sr. gisalmutan usab sa gatusan ka mga tinun-an sa elementarya, high school ug college didto sa syudad sa Danao nga nanagan sa 5k ug 3k run. —BANAT NEWS
- Latest
- Trending
