Losiaboi dili kasalmot sa 2nd Cebu City Marathon

CEBU, Philippines - Dili kasalmot si Kenyan missionary Simon Losiaboi sa nagsingabot nga 2nd Cebu City Marathon karong Enero 9 diha sa Asiatown IT Park sa Brgy. Apas, ning siyudad.

Si Losiaboi gipahamtangan og penalty sa kagamhanan sa Kenya tungod sa iyang pag-overstaying niya dinhi sa Pilipinas.

Gawas ni Losiaboi, ang second placer sa miaging Cebu City Marathon, ang inaugural champion nga usa usab ka Kenyan nga si Willy Tanui, gihugon-hugonan nga dili makasalmot.

Tungod niini, giatngan nga bag-ong nawong ang makampiyon sa 2nd edisyon sa Cebu City Marathon, ilabi na sa partisipasyon ni kanhi National Milo Marathon champion Cresenciano Sabal.

Samtang sa women’s division, kompirmado na nga mobalik dinhi sa Sugbu si Aileen Tolentino sa Cagayan De Oro aron manalipod sa iyang korona sa 42K women’s class.

Si John Pages sa Cebu Executive Runners Club (CERC), mibutyag nga mas paspas ug nindot ang rota ning higayona kay ang runners sa labing unang higayon moagi kapin sa usa ka kilometro nga underground tunnel sa South Road Properties (SRP). (BANAT)