CEBU, Philippines - Labing dugay nga lumba sa dagan dinhi sa Sugbu, ang Halad Kang Mano Amon, mopahigayon sa ilang ika-32nd Halad Kang Mano Amon Run karong Disyembre 24 didto sa Plaza Mano Amon sa Danao City.
Ang tinuig nga kalihukan ipahinungod kini ngadto sa giilang "Grand Old Man" sa siyudad sa Danao nga si Ramon 'Mano Amon' Durano Sr.
"Ipadayon gyud nako ni nga lumba tungod kay legasiya man kini sa akong lolo," matud pa ni kanhi Danao City councilor ug usa sa mga apo ni Mano Amon nga si Oscar 'Boying' Rodriguez,Jr. atol sa press conference kagahapon didto sa Ila Puti sa Asiatown IT Park. "Di man ni negosyo amo, ang amo lang is to promote physical fitness."
Gibana-banang moabot ngadto sa 1,000 ka mga runners ang mosalmot sa lumba nga naglatid sa 10K, 5K ug 3K categories tungod kay libre ang registration niini.
Ang 10K bukas sa tanang top runners, ang 5K alang sa mga residente, college ug high school students sa Danao City, samtang ang 3K alang sa elementary boys ug girls.
Ganting salapi ang madawat sa top 10 finishers sa matag dibisyon.
May libre nga bus nga mokuha sa mga runners gikan sa Sugbu ngadto sa Danao. Ang pick-up time, alas-4 sa kaadlawon atol sa adlaw sa lumba diha sa Cebu City Sports Center (CCSC).
Ang registration kutob lang karong Huwebes diha sa Philippine Sports Commission office sa CCSC. (BANATSPORTS)