Donaire dumating na sa bansa, dadalo sa kaarawan ni Pacquiao

MANILA, Philippines - Dumating na sa bansa ka­hapon si Nonito “The Filipino Flash” Donaire, Jr. para dumalo sa pagdiriwang ni world eight-division champion Manny Pacquiao ng kanyang ika-32 kaarawan sa Biyernes sa Shangri-La Hotel sa Makati City.

Ang 28-anyos na si Do­naire ay lulan ng Philippine Airlines flight (PR-105) at lumapag sa Ninoy Aquino International Airport Terminal 2 ganap na alas-3 ng ma­daling-araw.

Kasama ng tubong Talibon, Bohol ang kanyang asawang si taekwondo jin Rachel Marcial at ina­asahang makakasama ni­na promoter Bob Arum, trai­ner Freddie Roach at world super bantamweight king Juan Manuel Lopez ng Puerto Rico sa pagdalo sa kaarawan ni Pacquiao.

Nagmula si Donaire sa isang fourth-round KO kay Ukrainian Wladimir Sidorenko para makuha ang bakanteng World Boxing Council (WBC) Continental Americas bantamweight crown noong Disyembre 5 sa Honda Center sa Anaheim, California.

Ang panalo ni Donaire ang nagtakda sa kanyang paghahamon kay Mexican world bantamweight champion Fernando “Cochulita” Montiel sa Pebrero 19, 2011.

Idedepensa ng 32-an­yos na si Montiel ang kanyang mga hawak na World Boxing Council (WBC) at World Boxing Organization (WBO) bantamweight titles laban kay Donaire.

Bitbit ni Donaire ang kanyang 25-1-0 win-loss-draw ring record kasama ang 17 KO’s, habang dala ni Montiel ang 43-2-2 (33 KOs) slate.