Bernido, Pepito mibida sa Empowered Run

CEBU, Philippines - Sa pagkawala sa presensiya sa mga elite runners kinsa midagan sa Milo Marathon sa Manila , nakahigayun sila si Ian Bernido ug Juvelyn Pepito pagdominar sa Cebu leg sa IPI- Casino Femme Empowered Run Series kagahapon didto Parkmall carpark.

Si Bernido maoy nag-una sa men’s 10k run sa oras nga 33:48.12 , gisundan sa mga runner-ups nga sila si   Leo Colonia (33:50.36) ug Junnell Boncit (33:52.29).

Sa pikas bahin, gilupig ni Pepito ang beteranang si Christy Sevillerno-Tutor, human niya gisakmit ang titulo sa 10k women’s class, samtang si Joeyry Lee mipwesto sa ikatulong dapit sa oras nga 37.90.

Samtang niadtong Sabado, giharian ni Philip Duenas ang 15k men’s category sa Sci-Hi “Run to build” didto sa SM City-Cebu carpark.

Si Duenas mitapos sa lumba sa oras nga 50:55. Gisundan kini ni Ian Bernido sa oras nga 51:08 ug Leo Colonia nga milabang sa finish line isip third placer sa oras nga 51:12.

Sa female division, si Lee maoy migawas nga kampiyon sa oras nga 1:04.19, samtang sila si Alyssa Lagahit (1:08.52) ug Merlita Arias (1:09.04) maoy migawas nga second ug third placer. - Stephanie Sollante ug Connie Villacorta (BANAT NEWS)