CEBU, Philippines - Giusikan sa Dallas Mavericks ang ilang 25 puntos nga labaw sa first half apan gisalbar kini nilang Dirk Nowitzki ug Jason Terry sa naghinapos na ang oras sa ilang sangka batok sa Utah Jazz nga naila isip comebacking team aron mo-iskor 103-97 nga kadaogan kagahapon aron modaog og 12 ka sunodsunod nga higayon sa nagpadayong duwa sa National Basketball Association (NBA) didto sa American Airlines Center sa Dallas, Texas.
Mikadlit og 31 si Nowitzki uban sa iyang 15 ka rebounds ug nakigkumboya siya kang Terry kinsang 21 puntos sa first half dako'g natabang aron mainat ang inat winning streak ngadto sa 12 ug paghupot og 19-4 nga baraha ug maoy ikaduhang labing maayo sa Western Conference.
Ang Mavericks naglabaw pinaagi sa iskor, 29-4 sa may tunga-tunga sa first quarter ug human mapapas ang ilang dakong labaw, misumbalik ang Dallas aron pagbaraw sa Utah pinaagi sa 12 puntos ni Terry sa fourth quarter ug siyam gikan kang Nowitzki.
Nakahimo'g 10 for 12 si Nowitzki gikan sa iyang filed goal.“They slowly chipped away and chipped away and finally tied the game there in the fourth, and we had to really dig deep, grind it out and get some stops,” sumala pa ni Nowitzki.
"Terry got hot at the right moment which really helped, and made shots for us down the stretch. … We definitely made it harder on ourselves than we should have,” padayon pa ni Nowitzki.
Midugang og season-high 17 puntos si DeShawn Stevenson kinsa nag-igo sa iyang three-point shots diin mihimo siya'g 5 of 7 gikan sa 3-point range ug si Caron Butler miamot og 16 puntos.
Daw sa nagpahigayon og long-range shooting clinic ang Mavericks kagahapon diin nakahimo sila'g 14 of 26 nga three-point shots aron maila sila isip Western Conference heavyweight..
Ang lumad sa Dallas nga si Deron Williams mi-iskor og 19 sa iyang 34 puntos sa first half aron pangulohan ang Jazz kinsa midaog og siyam sa ilang 11 ka duwa. Si Paul Millsap mi-iskor ug 16 puntos ug si Ronnie Price mibahug og 14 puntos alang sa Utah.
Ang Dallas mihimo sab ug 13 of 18 ka pagsuway sa field goal sa first period ug mihimo'g 7 for 10 gikan sa 3-point range. Ang ilang 12-game winning maoy labing taas karon nga nahimo sa NBA sa kasamtangan.
Mao sab kini ang labing maayong pagsugod sa Mavericks gikan sa 2002-03 ug ikaduhang labing maayo sa kasaysayan sa ilang franchise.
Gitabla sa Jazz ang duwa sa 89-all may 4:31 ang nahibiling oras pinaagi sa three-point play ni Williams ug misikit ang Jazz, 95-96 human sa three-pointer ni Price may 2:40 ang nahibilin sa duwa.
Gitubag dayon kini ni Nowitzki og layup ug nakakubit ug foul aron pag-inat sa labaw ngadto sa kuatro puntos, 99-95 may 2:19 ang oras sa duwa.
“I told Dirk that I’m in the corner and I’m ready. Dirk did a great job drawing the defense. The passer makes the shooter,” matod pa ni Terry.
Sa laing duwa, gipatapsingan sa Memohis ang LA Clippers, 84-83, midaog ang Atlanta batok sa Indiana, 97-83, gilubong sa Boston ang Charlotte, 93-62, na-upset sa Tornto ang Detroit, 120-116, gilubong sa Chicago ang Minnesota, 113-82, midaog ang Houston batok sa Cleveland, 110-95 ug gilampaso sa Miami ang Sacramento, 104-83. – (GGM gikan sa NBA.com) BANAT NEWS