Pinoy Azkals
Kumusta mga Tirador!
Nakahinumdom pa ba mo sa atong lindog atol sa World FIFA 2010 sa South Africa diin atong gihisgotan ang ‘future’ sa mga Filipino nga makasulod bisan nalang sa regional qualifying rounds.
Wow! Wala gyud nako damhang karong tuiga pa lang ug dili na paabuton pa ang 2020 makasulod na gyud kita sa kalibotan sa soccer sports. Bisan wala akoy cable tv sa balay lunod-patay kong gisundan sa internet ang kalamboan sa atong “Pinoy Azkals” sa nagpadayong Asian Football Federation Suzuki Cup.
Niadtong milabay’ng Miyerkules sa gabii nakatabla ang Azkals sa mas eksperiyensyadong Burmese booters sa nasud sa Myanmar, pulos sila wala maka-score hangtud nga nahuman ang duwa.
Sa wala kaayo makasabot sa soccer, bisan og ‘zero’ o walay nakuhang score ang usa ka team sa torneyo aduna gihapon kini gamit tungod kay nadepensahan sa team ang ilang previous standing, nagpasabot nga wala tuod sila mosaka sa standing wala man pud sila mous-os. Ang kadtong team nga nagkinahanglan og daog maoy alaot.
Sa unang outing sa Azkals nga naa sa bracket B ilang gitabla ang sangka batok sa Singapore sa iskor nga 1-1, sunod mao ang defending champion ug host nga Vietnam niadtong Domingo didto mismo sa ilang tugkaran, apan niining higayona 2-0 ang iskor, daog ang Azkals nga maoy nakapakugang sa mga Vietnamese ug sa ubang koponan sa maong bracket tungod kay unsa ra man intawon ang Pilipinas sa natad sa soccer wala igdungog! Apan karon… gikulbaan na sila.
Kaniadto pa man ang Pilipinas maoy labing huyang sa football team dinhi sa Asya, apan ang nahitabo sa AFF Suzuki Cup ning semanahona mapatik sa kasaysayan sa football sa Asya ang paglampaso sa mga Pinoy sa mga Vietnamese.
Sa sunod nga outing sa mga Pinoy atubangon niini ang mas beterano ug eksperyensyadong Indonesians. Una pa nakasulod ang Azkals sa bracket B una na nilang gitabla ang Laos ug Cambodia aron makasulod sa maong torneyo, wala hinuon kadto igdungog kaayo nga mga qualifying matches.
Angayang ato kining ikapasigarbo sanglit kaniadto paman boksing, basketball ug bilyar ang atong abibahan ilabi na sa international competitions. Samtang ang atong football teams gilangaw ug dili gani halos lingion sa atong sports officials.
Tinuod layo pa kaayo kita sa ganghaan sa kasikatan, apan ang paglupig sa mga Pinoy sa mga regular football teams sa mga international competition usa na ka dakung kalampusan sa atong bagitong booters.
Sa motuo pa mo o sa dili, daghang mga mahiligon sa football o soccer sa atong nasud karon ang nabuhian og dugo tungod sa kapalaran nga nakab-ot sa Azkals karon. Usa ako kanilang nalipay bisan og dili ako football player.
Subo lang kaayong palandungon sa migawas nga balita sa opisyal nga namahayag ang IFF Suzuki Cup officials nga dili na mahinayon ang kasabutang anhi duwaon ang sangka sa Philippines ug Indonesia tungod kay wala pa kita'y kapasidad nga maka-host og international venue alang sa soccer.
Murag usa kini ka senyales alang sa atong mga sports officials nga pasiplatan usab ang soccer karong aduna nay nakab-ot ang atong Azkals dili lang dinhi kundili sa ubang nasud.
Akong nahibaw-an nga kinahanglan daw nga maka-accommodate og 30,000 ka mga tawo ang stadium aron mopasar sa international hosting sa duwa nga soccer ang usa ka nasud.
Ang labing dako nga stadium nato nga maka-accommodate og soccer mao ra ang naa sa Bacolod apan kun wala ko masayop 20,000 ray makaya niini.
Sige lang, bahala nalang og dili ta maka-host karon ang importante nga atong suportahan ang Azkals sa ilang mga outings. Dako baya ta og pag-asa niini nga sport bisan gagmay ang atong magduduwa kay paabtikay man ni.
* * *
PAHIBALO: Subling nagpasalamat ang Alpha Sigma Omega-Sigma Chi Gamma International Collegiate Service Fraternity and Sorority sa tanang brothers ug sisters nga mitabang sa atong “Tsinelas ni Dodong ug Inday” nga gidonar sa The Freeman Foundation. Samtang padayon pa usab kini nga proyekto alang sa atong anibersaryo karong Pebrero. Kadtong interesadong modonar og kwarta mahimong mokontak kang Brod Intsik.
* * *
PAGTULON-AN: Kung ang pagdaog walay sa kapuslanan, nganong ato pang ilista ang iskor?
- Latest
- Trending
