Gemmary Pawnshop, VKK Solmeat mag-abot sa finals

CEBU, Philippines - Mi-eskapo ang Gemmary Pawnshop bitbit ang 101-98 nga kadaugan batok sa LLBA aron moabante sa finals sa LLBA Rollway Friendly Inter-color basketball tournament didto sa Villas Magallanes gym sa Sta. Lucia Property sa Lapu-Lapu City.

Tulo ka players nga gipangulohan ni Salimbangon, kinsa miburak og 23 puntos ang mitimbre og double figures alang sa Gemmary, kinsa moduwa sa finals batok sa VKK Solmeat nga gitakda karong Disyembre 13 sa alas-8 sa gabii sa mao gihapon nga binyu.

Laing duha nga mirehistro og double digits alang sa Gemmary mao sila si Gastador nga adunay 19 puntos ug Eya sa iyang 16 puntos.

Kontrolado sa Gemmary ang duwa gikan sa pagsugod diin milansang kini og 14 puntos nga bentaha sa final period, apan sa katapusang 1:20 sa duwa, mi-rally ang LLBA luyo sa mga paningkamot nilang Tata Bardago, Allan Yu, Jimboy Igot ug Boboy Ciriaco aron pahakan ang labaw ngadto na lang sa uno punto, 98-99 sa nahabiling 12 segundos.

Sa daginutong oras, maangkon unta sa LLBA ang daog, apan si Jimboy Igot napakyas pagpasulod sa duha niya ka free throws ug nailog sa Gemmary ang bola nga maoy naghawan sa

ilang dalan paingon sa kadaugan.

Ang itsa ni Salimbangon nga mao sab ang topscorer sa Gemmary maoy mihingpit sa ilang kadaugan.

Ang liga hugtanon sab nga gipaluyohan ni Rolly dela Pieza.

Puntos Matag Usa

GEMMARY (101) - Salimbangon 23, Gastador 19, Eya 16, Gonzaga 8, Medina 8, Payawal 6, Cabigas 5, Medina 5, Gibuena 4, Villarde 4, Hermo 3

LLBA (98) - Bardago 25, Yu 14, Igot 14, Ciriaco 12, Ceniza 7, Manilag 7, Bontes 6, Aying 6, Medina 6, Ouano 2. – BANAT NEWS