Tabal nanghawod na sab

CEBU, Philippines - Usa ka adlaw human gidominar ang 1st Frankie Radaza Run, ang Sugbuanong running sensation nga si Mary Joy Tabal milangkat na sab og laing korona ug ning higayona sa Run to the Power of 3 niadtong miaging adlaw diha sa Cebu International Convention Center (CIIC) sa Mandaue City.

Ang garbo sa Southwestern University (SWU) nga si Tabal mitapos sa 10K run sulod sa 41 minutos ug 45 segundos. Gipilde niya ang beteranang runners nga sila si Madelyn Carter (46:08) ug Mereiz Ramirez (46:32) nga mipahiluna sa ikaduha ug ikatulo nga mga dapit.

Sa 10K men’s class, usa ka dakung upset ang gihimo ni John Philip Dueñas dihang iyang gilupig ang duha ka top male runners sa Sugbu nga sila si Mendel Lopez ug Jobert Carolino.

Gitapos ni Duenas ang lumba sa oras nga 35:42.12, gisundan ni Lopez nga mi-oras og 35:53, samtang si Carolino mimarka og 36:53.

Didto sa The Terraces sa Ayala Center-Cebu, sila si Jess Gonzaga ug Jhean Andrin   maoy nanghawod sa ilang tagsa-tagsa ka dibisyon sa 10K run sa Red Cross Run for Humanity.

Si Gonzaga maoy hari sa men’s class nga mi-oras og 33:50.223, samtang si Andrin maoy reyna sa women’s category sa oras nga 44:28.860. (BANATSPORTS)