2nd QCIM sa Kenyans uli

MANILA, Philippines - Sa ikalawang sunod na pagkakataon, muling di­nomina ng mga Kenyan runners ang Quezon City International Marathon.

Pinagharian ni Robert Kosgei ang men’s division, habang ang kababayang si Lydia Jerotich Rutto ang nagreyna sa women’s class sa centerpiece men’s at women’s 42-kilometer races kahapon sa QC Memorial Circle.

Naglista ang 32-anyos na si Kosgei ng bilis na 2:23.52 para burahin ang dating 2:30.08 ng kababa­yang si Hillary Kipchumba noong 2009 at ibulsa ang top prize P250,000.

Inungusan ni Kosgei ang Kenyan ring si Camsur International kingpin Richard Kemeli Kimboi (2:23.31) na tumanggap ng P100,000 kasunod ang kababayang si Erick Kimaiyo (2:33.55) na nakakuha ng P50,000 sa culminating event ng pagdiriwang ng 72nd foundation anniversary ng Quezon City.

Tumapos naman si Filipino bet Eric Panique sa 10th spot sa kanyang oras na 2:32.36.

Tumiwalag naman si Rutto sa isang three-man pack sa huling kilometro upang iposte ang tiyempong 2:54.08 at angkinin ang P250,000.

Binasag ni Rutto ang 2:58.59 record ng kababa­yang si Doreen Kitaka noong 2009 kasunod ang mga kagrupong sina Florence Chepkurui (2:55.58) at Zeddy Chepkoech (2:55.56). Si Mischelle Gilbuena ay tumapos sa sixth spot sa ilalim ng anim na Ken­yan entries sa kanyang oras na 3:15.48.

Ang mga Kenyans rin ang namayani sa men’s at women’s 21K races mula sa mga panalo nina Silas Gichom (1:16.45) at Susan Terkeptai (1:41.19).