TCC miratsada sa RCG
CEBU, Philippines - Pambato sa University of Southern Philippines Foundation (USPF) nga si Kenrick Alivio maoy midagkot sa kainit sa Team Cebu City (TCC) dihang mikabkab siya sa labing unang bulawan sa Regional Collegiate Games (RCG) kagahapon diha sa Cebu City Sports Center (CCSC).
Mipakita gilayon sa ilang kamangtas ang TCC dihang mihakot kini og 22 ka golds, 18 ka silvers ug unom ka bronze sa unang adlaw sa duha ka adlaw nga multi-sporting event.
Naka-gold si Alivio sa men's shot put event sa gilay-on nga 11.48 metros nga igo na kaayo pagpilde ni Genalito Boligao sa Bohol (10.23m) ug sa teammate niining si Geovani Necesario (9.99m) sa University of Cebu (UC).
Ang powerhouse team sa UC maoy daghang natunol og bulawan.
Ang multi-decorated sprinter nga si Lindley Navaja nidominar sa 20-m event sa oras nga 22.84 segundos.
Si Mary Joy Tabal sa Southwestern University (SWU) nidaog og tulo ka bulawan sa 400m, 5,000m ug 3,000m run.
Si Lorna Olarito nanghawod sa 400m hurdles (1:09.27 minute) ug 200m (26.68 sec.), samtang si Rose Baylon mihakot sab og duha ka golds sa 5K ug 3K walkathon.
Ang ubang gold medalists mao sila si Almira Gay Sadaya (100m hurdles), Reymar Bautro (400m hurdles), Jason Giganto (discuss throw), Dharl Pitogo (110m hurdles), Junrey Andales (400m), Aiza Suaybaguio (1500m), Jorry Ycong (1500 men), Joel Delposo (10K), Jude Thaddeus Rivera (5K), Ernesto Ybanez Jr. ug Irene Baluran sa men ug women’s long jump. (BANATSPORTS)
- Latest
- Trending
