CEBU, Philippines - Sugdan na ang gubat sa labing tang-an nga mga atleta sa kolehiyo sa rehiyon dihang ang Regional Collegiate Games (RCG), nga naila kaniadto isip Private Schools Athletic Association (PRISAA) Meet pormal nang buksan diha sa Aznar Coliseum.
Kapin sa 1,000 ka atleta ug coaches gikan sa Bohol, Negros Oriental, Siquijor ug Cebu ang mag-abot dinhi sa Sugbu aron magtigi sa nagkalain-laing sporting events ning tulo ka adlaw nga athletic meet.
Ang top performers adunay kahigayonan nga morepresentar sa Central Visayas sa National Collegiate Games nga gikatakda sa Pebrero 20-26 sunod tuig didto sa kaulohan.
Sa miaging tuig nga national finals, ang Central Visayas mitungtong sa ikatulo sa overall, apan mihakot kini og 33 ka golds, 42 ka silvers ug 34 ka bronzes.
Sa gihapon, ang National Capital Region (NCR) maoy dakung mananaog dihang mihakot kini og 173 gold, 42 silver ug 40 bronze medals, gisundan sa Region VI (Western Visayas) nga adunay 40 gold, 75 silver ug 54 bronze medal tally.
Ang games proper sugdan ugma sa managlahing binyu. (BANAT)