Melindo Mibuntog

CEBU, Philippines - Gipamatud-an ni Milan ‘El Metodico’ Melindo nga hinog na siya alang sa usa ka world title fight dihang iyang gigamit ang iyang talagsaong abilidad ug mahait nga kinumo aron sa pagpukan sa kanhi IBF flyweight champion Carlos “El Olimpico” Tamara via unanimous decision sa main event of “Pinoy Pride 2- Best of the Best” niadtong miaging gabii didto sa Waterfront Cebu City Hotel and Casino.

Dili hinuon kini sayun nga kadaugan alang sa lumad nga taga-Cagayan de Oro tungod usab sa kalig-on sa Colombian boxer kinsa daw nagkakusug samtang nagkataas ang round.

Pakyas man sa iyang panganti nga patumbahun si Tamara sa round five, nagpabilin gihapon ang konsentrasyon ni Melindo nga migamit sa iyang counter-punching aron mokolekta og puntos paingun ngadto sa final round.

Pulos naglaraw og daog, gibubu sa duha ka protagonista ang tanan nilang kusug sa final round, apan ang ALA fighter nga si Melindo maoy nakabintaha human siya makaigo og one-two combination nga nakapatay-og ni Tamara kinsa diriyot milusot sa ring.

Human sa napulo ka hugna nga sinumbagay, tulo ka mga hurado ang miiskor og 98-92, 98-92 ug 97-93, tanan pabor ni Melindo, kinsa pabiling walay pilde sulod sa 23 ka away.

“Gusto gyud nako siya nga tapuson sa round five, pero wa nako nakaya so ako gigamit ako utok,” matud pa ni Melindo.“Lisud gamay kay habang nagkataas ang round, lalo siyang lumalakas.”

Sa iyang bahin, si ALA Promotions president Michael Aldeguer miangkon nga gibati siya og gamayng kulba atol sa fifth round dihang nakita niya nga gipugos ni Melindo pagpatumba si Tamara.

“I saw he wanted to knock the guy out, and I was little bit worried because Tamara was anticipating it and may use it to drain Melindo,” matud pa ni Aldeguer.

Dugang pa ni Aldeguer nga sa impresibong kadaugan ni Melindo, napamatud-an ni Melindo nga andam na kini alang sa mas dakung away sunod tuig.

“Before the world title, Melindo will probably fight for an IBF eliminator next year here in Cebu,” dugang pa ni Aldeguer.

Gidasunan kini sa trainer ni Tamara nga si Edgar “Butch” Sanchez kinsa mibilib sa gipakita ni Melindo batok sa iyang boksidor. “The kid got some skills and he has a bright future ahead of him,” matud pa ni Sanchez.

Sa supporting main event, milampos ang Sugbuanong si Rocky Fuentes (28-6-2, 18KOs) pagdepensa sa iyang OPBF flyweight title batok ni Thai Inthanon Sithchamuang (9-4, 4KOs) kinsa mibalitok sa 2:19 sa round 2 human maigo sa left hook ni Fuentes.

Gipahunung usab ni kanhi minimumweight title-holder Florante Condes (25-5-1, 20KOs) ang Hapon nga si Japanese Kenichi Horikawa (20-9-1, 4KOs) sa round seven, samtang nakaipsot pinaagi sa majority decision si OPBF junior welterweight contender Randy Suico (30-6-1, 25KOs) batok sa Pinoy nga si Arnel Tinampay (12-12, 4KOs). (Lemuel P. Maglinte)