Pinaksitay na
CEBU, Philippines - Atubangon na ni Milan 'El Metodico' Melindo ang labing dakung hagit sa iyang karera batok ni kanhi IBF flyweight king Carlos 'El Olimpico' Tamara sa main event sa "Pinoy Pride 2- Best of the Best" karong gabii diha sa Pacific grand ballroom sa Waterfront-Cebu City Hotel and Casino. Si Melindo (21-0, 6 KOs) nga mitimbang og 112 lbs., mipakita sa iyang kaandam nga makigsinukmagay ni Tamara (21-5, 15KOs) nga mitimbang sab og 112.5 lbs. atol sa official weigh-in kagahapon didto sa SM Entertainment Center.
Sa wala pa miabot sa Sugbu si Tamara, daan nang gipadayag ni Melindo nga kampanti siya nga modaog nga maoy moabli sa tabil alang sa iyang damgo nga world title fight.
Timaan sa iyang dakung kompiyansa, si Melindo nanganti nga patumbahon si Tamara sa ikalimang round atubangan sa boxing fans.
Kini maisip nga labing unang away ni Melindo batok sa usa ka top caliber boxer sa iyang dibisyon. Bitbit usab niya ang tahas nga mobawos ni Tamara, kinsa maoy mihukas sa bakus ni Fil-American Brian Viloria.
Si Tamara midaog pinaagi sa 12-round technical knockout niadtong Enero didto sa Cuneta Astrodome.
Sa undercard sa ALA Promotions ug ABS-CBN Sports boxing event, si OPBF flyweight champion Rocky Fuentes (27-6, 17KOs) modepensa sa labing unang higayon sa iyang bakus dinhi sa Cebu batok ni Thai Inthanon Sithchamuang (9-3, 2KOs), samtang si former IBF king Florante Condes (24-5, 20KOs) padayon sa iyang kampanya alang sa laing world title bout batok ni Kenichi Horikawa sa Japan.
Mobalik usab og away ubos sa ALA Stable, ang kanhi three-division OPBF title-holder nga si Randy 'Kumong Bato' Suico (29-5, 25KOs) batok sa kanhi sparmate ni Manny Pacquiao nga si Arnel Tinampay sa Bohol
Mosaka usab sa ring sa ikaduhang higayon isip professional fighter si Dodie Boy Peñalosa Jr., anak ni kanhi two division world champion Diosdado 'Dodie Boy' Peñalosa batok ni Jomar Torreon. – BANAT NEWS
- Latest
- Trending
