UTASSCO Utility disgrasya sa F&E Electrical Supply

CEBU, Philippines - Gibaraw sa F&E Electrical Supply ang tinguha sa UTASSCO Utility nga moharos sa elimination round pinaagi sa pagpilde, 112-111 paghuman sa elimination round sa nagpadayong Power Forty Christmas League diha sa Inayawan Sports Complex.

Sa sayo pa, ang Water Market miposte sab og daog batok sa Allyn & Sons, 88-78 aron sakmiton ang ikaduhang puwesto. Nagtabla ang Water Market ug ang UTASSCO bitbit ang managsamang 4-1 win-loss records, apan ang naulahi maoy top qualifier alang sa semifinals   tungod kay sila man maoy midaog batok sa Water Market.

Isip top two qualifiers, magpa-abot na lang ang UTASSCO ug ang Water Market sa resulta sa knockout game sa wild card round tali sa Allyn & Sons ug sa F&E Electrical Supply sunod semana. Ang modaog maoy makigharong sa Water Market sa tinaktakay nga semifinal.

Ang modaog tali sa Park ‘N Go Bakeshop ug sa Precious Ellah sa laing wild card round maoy makigtakus batok sa UTASSCO.

Si Inayawan brgy. councilor Mario Tabar mirehistro og season-high 35 puntos aron pangulohan ang F&E Electrical Supply, sila si Allan Lim ug Dodong Piezas miamot og 24 ug 22 puntos, matag usa.

Miantog sab og season-high 35 puntos si Wilbor Cabrera aron pangulohan ang UTASSCO, gisundan ni Alex Mercado sa iyang 27 puntos, samtang si team owner Atty. Flor Yosores miamot og 14 puntos.

Sa laing duwa, si Tony Ungria mikimada og 29 puntos, samtang si Gideon Bughao miabuno og 15 puntos alang sa Water Market. Si team Vez Eleguin ug Edwin Dejacto parehong miamot og 14 puntos sa maong kadaugan. Ang pilderong Allyn & Sons gipangulohan nilang Adot Tabar ug Carding Vernaiz nga nagkumboya og 39 puntos.

Puntos Matag Usa

Unang duwa:

Water Market (88) - Ungria 29, Bughao 15, Eleguin 14, Dejacto 14, Labalan 6, Mapait 2, Yosores 2, Cayacap 2, Dacalos 2

Allyn & Sons (78) - Tabar 20, Vernaiz 19, Cañedo 11, Albano 9, Sandal 5, Sabejon 4, Colinares 3, Cabase 2

Ikaduhang duwa:

F&E Electl. Supply (112) -Tabar 35, Lim 24, Piezas 22, Mosqueda 10, Abasolo 8, Pacquiao 5, Cabatas 4

UTASSCO (111) - Cabrera 35, Mercado 27, Yosores 14, Mabalcon 9, Yu 4, Labajo 4, Atillo 3, Abasolo 3. – BANAT NEWS