CEBU, Philippines - Nadungog sa duha ka mga dunggan ni WBC Youth Intercontinental flyweight champion Milan 'El Metodico' Melindo ang pamahayag sa trainer sa iyang kontra nga ngitngit ang iyang kahigayonan nga mokulit og daog.
Imbes nga malisang, si Melindo (22-0, 7KOs) mibuhi og pamahayag ug mibahad nga tumbahon ang kanhi IBF light flyweight titlist Carlos Tamara (21-5, 15KOs) sa ikalimang round sa main event sa "Pinoy Pride 2- Best of the Best" ugma sa gabii diha sa Pacific grand ballroom sa Waterfront-Cebu City Hotel and Casino.
Agi’g tubag sa komento sa trainer ni Tamara nga si Edgar 'Butch' Sanchez, kinsa miingon nga usa ka dakung sayop ang iyang nahimo sa pakigsangka sa iyang batos, si Melindo maisugon kaayong mitubag nga mouli ang Team Tamara nga walay kadasig.
"Pildiha sa ko, unya na ang estorya. I trained hard for this fight. Usa ko ka counter-puncher ug nakita nako nga kutob ra siya sa five rounds," matud pa ni Melindo atol sa final press conference kagahapon didto sa Aegean room sa Waterfront Hotel.
Sa iyang bahin, si ALA Boxing Gym chief strategist Edito Villamor mipasidaan sa Team Tamara nga dili basta-basta si Melindo tungod kay grabeng training ang iyang giagian alang sa labing dakung away sa iyang karera.
"Human sa away against Jin Man Jeon last August, deritso na ang among training pagkahibawo nga big fight ang mosunod," matud pa ni Villamor. "Kung may chance mi sa 5th round amo siya tumbahon, pero ready mi hangtod sa last round kay lig-on ma ni si Tamara."
Sama ni Melindo, todo-ensayo usab si Tamara sa wala pa sila migikan padulong dinhi sa Sugbu. "Aside from sparring 150 rounds, we were also had the chance to join world bantamweight kingpin Joseph 'Kingkong' Agbeko in New York," matud ni Sanchez.
Sa undercard sa ALA Promotions ug ABS-CBN Sports boxing event, si OPBF flyweight champion Rocky Fuentes (27-6, 17KOs) modepensa sa labing unang higayon sa iyang bakus dinhi sa Cebu batok ni Thai Inthanon Sithchamuang (9-3, 2KOs), samtang si former IBF king Florante Condes (24-5, 20KOs) padayon sa iyang kampanya alang sa laing world title bout batok ni Kenichi Horikawa sa Japan.
Mobalik usab og away ubos sa ALA Stable, ang kanhi three-division OPBF title-holder Randy 'Kumong Bato' Suico (29-5, 25KOs) batok sa kanhi sparmate ni Manny Pacquiao nga si Arnel Tinampay sa Bohol.
Karong alas-11 sa buntag, himuon ang official weigh-in sa mga boksidor diha sa Atrium sa SM City-Cebu. – BANAT NEWS