CEBU, Philippines - Usa ka dakung sayop ni ALA Boy Milan 'El Metodico' Melindo ang pakigsangka niya batok ni kanhi IBF junior flyweight champion Carlos 'El Olimpico' Tamara.
Mao kini ang pagtuo ni Edgar Sanchez, ang trainer ni Tamara uban sa laing mga boksidor nga miabot dinhi sa Sugbu kagahapon. Sila si Melindo ug Tamara maoy main event sa "Pinoy Pride 2" boxing card karong Sabado nga sugdan sa alas-6 sa gabii diha sa Waterfront Cebu City Hotel and Casino.
Giisip niya nga sama sa kaugalingon niyang anak, gipadayag ni Sanchez ang daku niyang pagsalig sa Colombian boxer nga iyang gihulagway nga gutom sa laing world title.
"We are more confident going to this fight than fighting Brian Viloria," matud pa ni Sanchez atol sa press conference kagahapon diha sa Golden Cowrie Restaurant sa Brgy. Lahug, ning siyudad.
Nabaniog ang ngalan ni Tamara sa kalibotan sa boksing human kini mihimo og dakung upset nga kadaugan batok ni Fil-Am Brian 'The Hawaiian Punch' Viloria, nga iyang gi-TKO sa round 12 sa ilang sangka niadtong Enero 23 didto sa Cuneta Astrodome.
Daku og respeto si Sanchez ngadto ni Melindo, apan nagtuo siya nga hilaw pa kini nga mo-away batok sa usa ka dekalibreng boksidor sama ni Tamara.
"Melindo is a well-rounded boxer, but not in Tamara’s level," matud pa ni Sanchez. "I mean look at Tamara’s record and the caliber of boxers he fought. You got Viloria, Giovani Segura and Luis Alberto Lazarte, who defeated him in a close decision."
Gipasabot ni Tamara nga rason sa iyang sikit nga kapildihan batok ni Lazarte mao ang pagpaubos og timbang, apan lahi karon tungod kay sangkaon niya si Melindo sa 112 lbs. nga haom kaniya.
Si Tamara adunay record nga 21-5, 15KOs, samtang si Melindo nagbitbit og 22 ka daog, pito niini gikan sa knockout.
Ang duha ka protagonista mag-abot sa labing unang higayon karong adlawa atol sa final press conference sa alas-11 sa buntag sa Aegean Room sa Waterfront Cebu City Hotel and Casino. (BANAT)