Cebuano judokas nagmangtas

CEBU, Philippines - Tulo ka Sugbuanong judokas ang mikabkab og tulo ka bulawang medalya sa 1st National Individual Invitational Judo Tournament didto sa SM City-Iloilo niadtong weekend.

Si Rey Carriage, Hazel Faye Laude ug Christy Rama mihakot og tagsa ka bulawan human nila gidominar ang tagsa-tagsa nila ka kategoriya.

Si Carriaga naghari sa men's 60 kgs. division pinaagi sa pagpilde ni Carl Villarin sa Cagayan de Oro.

Sa pikas bahin, sila si Laude ug Rama mao sab ang nanghawod dihang gipilde ni Laude si Crystal Marcalinas sa Iloilo ubos sa 48 kgs. class, samtang si Rama mipukan ni Medalla Poras sa Passi sa 52-57 kgs. sa all-white division.

Ang mga pambato sa Sugbu mihakot sab og lima ka silvers ug duha ka bronzes.

Si Allan Antigua sa University of Cebu (UC) Cebu City Judo Club ug Ariel Albios sa University of San Carlos (USC) Gentleway midaog og silver sa 66 kgs. ug 73 kgs. open belt category.

Si Antigua miyukbo ngadto ni John Ramon Quin sa Zamboanga City, samtang si Albios miluhod ni Ian Domalogdog sa Cagayan de Oro City.

Ilang mga teammates nga sila Johanns Quinio ug Bryan Canillo mitiltil og bronze medals.

Lain pang silver medalists mao sila si Apple Rose Canico (45-48 kgs), Jenny Porio (45 kgs), ug Joanna Gilig (63-70 kgs), samtang ang laing bronze medalists mao sila si Odessa Acedilo (52 kgs) sa open belt category ug Dennis Chris Odever (55kgs) sa kid’s division. (BANATNEWS)