Pito ka cancer patients beneficiary sa "Run for BB 2"

CEBU, Philippines - Pito ka mga bata nga nag-antos karon sa sakit nga cancer maoy mga beneficiary sa gipasiugdahang lumba sa Chong Hua Hospital nga uloha'g "Run for BB 2" karong Disyembre 5 diha sa Chong Hua Medical Arts.

Human sa malampuson nilang "Run for Bebe 2" niadtong Hunyo, nga namugna isip fund-raising run alang sa usa nila ka kauban nga adunay cancer, nahukman sa Chong Hua Hospital-Nursing Service nga mopahigayon og laing lumba ug ning higayona alang sa pito ka mga kabus nga bata nga adunay cancer.

Ang maong mga bata (mga pangan gipugngan) nga nag-edad gikan sa pito ka bulan ngadto sa 10-anyos mga pinili sa Chong Hua Hospital nga tagaan og libreng cancer treatment sama sa chemotherapy.

"Tungod kay aduna man sab laing duha ka lumba nga modungan, nag-expect mi og bisan 500 ka runners nga mosalmot, pero bukas pud mi sa mga gustong mohatag og financial donation alang sa mga bata," matud pa ni Chief nurse Rosario Naomi T. Fajardo, atol sa press conference kagahapon didto sa Chong Hua Hospital.

Ganting salapi ang madawat sa top three finishers sa 10K category, samtang ang top five finishers sa 5K ug 3K makadawat og medalya ug sertipiko.

Aduna kini registration fee nga P250 libre na ang singlet ug snacks. Mahimong magparehistro sa Cebu City Sports Center ug sa Nursing Office, OPD ug Cardio Unit sa Chong Hua Hospital. (BANATNEWS)