Cebu team midaog sa Honda Dealer's Cup

CEBU, Philippines - Gisakmit sa Cebu-based Honda Motorworld Racing Team ang prestihiyosong Honda Dealer's Cup didto sa Carmona, Cavite tracks.

Ang mga tang-an sa Luzon, Visayas ug Mindanao nagtigi alang sa dungog sa final, apan ang Sugbuanong si Garry Caneda Jr. maoy mipatigbabaw sa iyang dibisyon aron pagdaog sa Dealer's Cup batok ni Rizaldy Canare sa Luzon,   samtang ang giilang underbone specialist sa Mindanao nga si Jay-R Daguio milandig sa ikatulo nga dapit.

Si Peter Gjengaar midugang og dungog ngadto sa Jonel Borromeo's team, Honda Motorworld-Visayas ubos ni coach Bobby Mencias dihang nidaog kini sa inter-club 130 cc. class batok ni Daguio ug Geo Adriano sa Luzon nga miangkon sa ikaduha ug ikatulo nga dapit.

Laing tulo ka Sugbuanong scooter riders nihatag sab og dungog dihang sila si Lyndon Requilme ug Jeslouie Vega miangkon sa unang-duha ka dapit sa inter-club 160 Beat scooter class, samtang si Mark Capoy napunta sa ikatulo sa 60 cc. scooter special event. (BANATSPORTS)