Delos Santos nag-una sa MO plus run

CEBU, Philippines - Mibalik sa Sugbu si Mary Grace Delos Santos aron panalipdan ang iyang trono isip reyna sa Cebu running human siya mikampiyon sa 15k run sa MO Plus Run kagahapon sa buntag didto sa Asiatown IT Park, Brgy.Apas, ning syudad.

Human sa malampuson niyang kampaniya didto sa kaulohan, mibalik dinhi sa Sugbu ang lumad nga taga-Zamboanga nga si Delos Santos kinsa midominar sa women's open batok sa Sugbuanong si Madelyn Carter ug Christy Sevilleno-Tutor kinsa mipahiluna sa ikaduha ug ikatulong dapit.

Sa men's open, si Joebert Carolino padayung mikolekta og mga kampiyonato human niya gipilde ang mga runner-up nga sila si Philip Duenas sa Southwestern University (SWU) ug Davao runner nga si Elmer Bartolo.

Mibunga usab ang hukom ni Mary Joy Tabal nga mudagan sa mas mubo nga distansya dihang gisakmit niya ang titulo sa 5k women's open uban sa second ug third placer nga sila si Aiza Suwaybaguio ug Crizel Diongson.

Ang produkto sa University of Southern Philippines Foundation (USPF) nga si Joel Delposo nangharus sa 5k men's class, gisundan nila ni Jordan Bacun ug Ian Bernido.