CEBU, Philippines - Nakatabla si Mark Alasagas sa iyang pakigsangka batok ni Jeje Dignos sa final round, apan igo na kaayo kadto alang kaniya aron maghari sa November edition sa OPASCOR Inter-Employee Monthly Chess Tournament diha sa OPASCOR Training Room.
Si Alasagas mitapos sa 7-round Swiss system competition uban ang 12.0 puntos. Si Atty. Tomas Riveral, kinsa miharos ni Gerry Dignos, 2-0 sud sa 27 ka duso sa English Opening, mipahiluna sa ikaduha nga dapit sa iyang 10.5 puntos, samtang si Jeje Dignos mitapos sa ikatulo. Miangkon sa ikaupat mao si Albert Mula sa iyang 8.5 puntos, samtang sila si Tony Riveral, Ervin Riveral ug Elmer Respecia maoy mi-okupar gikan sa ikalima hangtod sa ikapito nga dapit sa managsamang 8.0 puntos.
Mokompleto sa top 10 finishers mao sila si Piper Riveral, Gerry Dignos ug Evan Riveral.
Ang mga duwa gidumala ni international arbiter Marvin Ruelan ug Tony Cabibil. – BANAT NEWS