Cebu City Hall sportsfest gibuksan

CEBU, Philippines - Gipakita sa mga kawani sa Cebu City Hall nga dili lang sila kutob sa opisina, apan sa paugnat sa kusog sab dihang   ilang gipakita ang tinagoan nilang abilidad sa 2010 Cebu City Hall Sportsfest kagahapon diha sa Cebu City Sports Center (CCSC).

Sila si Rodulfo Atillo sa Dept. of Veterinary Medicine and Fisheries (DPVF) ug si Sinbeth Orellano sa Sangguniang Panglungsod midaog og duha ka titulo sa track and field events.

Si Atillo nakampiyon sa 100m dash, gisundan nila ni Warjon Ybañez sa Mayor's Office ug Elzardy Caminade sa City Admin Dept. nga mipahiluna sa ikaduha ug ikatulo nga dapit.

Nag-una usab si Atillo sa 50m sprint event, samtang mi-okupar sa ikaduha ug ikatulo nga dapit sila si Caminade ug Ruel Labrado.

Sama ni Atillo, si Orellano miharos sab sa 100m ug 50m women’s sprint events. Nagsunod ni Orellano sa 100m event sila si May Cabatino sa CCMC ug Gian Karla Soriano sa DSWS.

Ang mga runners-up ni Orellano sa 50m dash mao sila si Cabatino ug ang pambato sa Mayor's Office nga si Laniebeth Morales.

Sa Fun run category, si Caminade ug Myla Urot sa Mayor's Office mao ang mipatigbabaw sa maong lumba.

Ang track and field ug ang Fun run maoy mibukas sa tinuig nga sportsfest. - Concepcion W. Villacorta ug Stephanie J. Solante (BANAT NEWS)