Blue mipatigbabaw sa Red sa Thursday Club caging

CEBU, Philippines - Duha ka konsehal sa Brgy. Jugan, Consolacion nga sila si Boboy Pepito ug Tony Pepito ang nagkumboya og 33 puntos aron pangulohan ang Blue team pagpukan sa Red team, 69-64 sa nagkainit nga aksiyon sa Thursday Club Inter-color basketball tournament didto sa Brgy. Jugan gym sa Consolacion.

Si Boboy Pepito mitikdol og 16 puntos, samtang si Tony Pepito mitimang og 15 puntos alang sa Blue team nga milansang sa ilang ikaupat nga daog sud sa unom ka duwa.

Ang Red nga nagtangag sab og 4-2 nga baraha, gipangulohan ni Alfon Pepito pinaagi sa iyang 23 puntos, gisundan ni Jerome Taborada nga adunay 12 puntos.

Sa pasiunang duwa, ang White team mikulit sa ikatulo nilang daog batok sa Yellow team sa iskor nga 75-71.

Ang White ug Yellow parehong nagbitbit og 3-4 nga baraha.

Upat ka players sa White nga gipangulohan ni Pastoriza ang mirehistro og double figures pinaagi sa iyang 19 puntos. Gisundan ni Ganub sa iyang 18, samtang sila si Bagundol ug Tinovalle miabuno og 10 puntos matag usa.

Si Carlos Sasing, kinsa miposa og 23 puntos maoy topscorer sa Yellow. Si Brix Secretaria miantog og 11 puntos ug si Jugan brgy. councilor Dado Ygot mitudas og 10 puntos. (BANATSPORTS)