CEBU, Philippines - Pambatong boksidor sa Mandaue nga si Eleno Traya, ang gold medalist sa bag-o lang natapos nga Visayas Amateur Boxing Championship, mokatkat na sab sa ring sa ipahigayong Summit Natural Drinking Water Amateur Fight Night karong gabii diha sa Mandaue City Plaza Square.
Si Traya, ang last minute entry sa Team Mandaue nga maoy overall champion sa ABAP regional tournament, makigsangka ni Ryan Cagatilla sa Philippine Australia Boxing Club (PABC) ubos sa 57 kgs. category.
Lain pang mga boksidor nga magbinukbukay sa 57 kgs. division mao ang mga out-of-towners nga sila si Ronnel Abion sa Tagbilaran ug John Ivor Lastrilla sa Tacloban.
Si Raymond Tabogon sa Misamis Oriental, moharong ni Reovyl Sentillas sa Flores Boxing Club sa 54 kgs. class, samtang si Richard Barrios sa Bais makigbinukbukay ni Jimboy Mayang sa Bacolod sa 48 kgs. division.
Mo-away usab ang mga stablemates ni Sentillas nga sila si Rommel Tuñacao ug Mark Pereño.
Moladlad sab sa ilang abilidad sila si Kent Tuñacao, Raymund Rama, Mark Desena, Polid Banal, Vicente Seos-e Jr., Rommel Casañares sa Banilad, Jed Mark Longakit ug Cherwilliam Cantel sa Maguikay, Efford Tesales ug Sherwin Caday sa Sanai Boxing Gym, Richie Montealto sa Consolacion ug Jason Pasigna-signa sa Talamban. (BANATSPORTS)