ALA-Summit boxing balik sa Bohol
CEBU, Philippines - Ang ALA Summit Fight Night Boxing Tour mobalik na sab sa probinsiya sa Bohol karong Nobiyembre 20 didto sa Island City Mall carpark, Tagbilaran City.
Magsangka sa main event mao si super bantamweight prospect Genesis Servania sa Bacolod City batok ni Alvin Maquiling sa Sajugla Stable sa Bukidnon.
Gihulagway nga usa ka kulbahinam ang away tungod kay ang duha ka boksidor parehong wala pa makatilaw og pilde.
Si Servania (7-0, 2KOs) gikan pa sa usa ka impresibong unanimous decision nga kadaugan batok ni Jestoni Pepito Singwangcha sa Cebu City, samtang si Maquiling mosuway pagsakmit sa ikaupat niyang sunod-sunod nga daog.
Sa supporting bout, si Rufino 'Pinoy' Mante (6-9-1, 2KOs) sa Bohol makigsinukliay og kumo batok sa pambato sa Harada Stable nga si Ricky Sismundo (15-5, 7KOs).
Mokompleto sa undercard mao ang sangka sa flyweights nga sila si Zaldy Aroa sa Bantayan Island batok Anthony Galigao sa Bohol, Jocel Gestopa sa Consolacion batok ni Andelou Adajar sa Butuan.
Mopakita usab og aksiyon ang Tagbilaran boys nga sila si Jomar Cordinillo, Pedro Balaba ug Jefferson Reodeque.
Si Cordinillo makigsangka ni Roel Garcia sa Butuan City, si Balaba moharong ni Jicky Gaco sa Boljoon, samtang si Reodeque makigbatok ni Jade Yagahon sa Bukidnon. – BANAT NEWS
- Latest
- Trending
