SHS-AdC teams nagpanikad na

CEBU, Philippines - Gikatakdang mobiya paingon sa Iloilo sa tapos ning semanaha ang Sacred Heart School-Ateneo de Cebu (SHS-AdC) Passerelle ug Small Basketeers Philippines (SBP) teams alang sa regional finals sa MILO BEST SBP-Passerelle Twin Tournament.

Tinguha sa SHS-AdC Magis Eagles nga mohipos sa ilang ikatulong sunod-sunod nga Visayas championship sa Passerelle division diin sila moharong sa St. John's Institute sa Bacolod City, Ateneo de Iloilo ug Colegio de la Purisima Concepcion College sa Roxas.

Ang SHS-AdC maghangad sa ilang beterano nga sila si Andrian Muller, Rebreb Diputado, Julius Cadavis, RG Araw-araw, Patrick Go, Jet Wahing ug Reggie Abbun nga moduwa sa ilang katapusang tuig uban sa koponan.

Sa SBP division, ang SHS-AdC nga katapusang nadala sa regional finals niadtong 2007, magsagubang og bug-at nga tahas diin ilang banggaon ang pre-tournament favorite University of St. La Salle sa Bacolod, Ateneo de Iloilo ug Colegio de la Purisima Concepcion College sa Roxas.

Ang Ateneo maoy defending Visayas SBP champion, samtang ang University of St. La Salle maoy giisip sab nga lig-ong kontra tungod sa ilang maayong labok sa Batang PBA tournament niadtong summer.

Ang kampiyon sa regional finals moharong batok sa laing tulo ka regional champions gikan sa NCR, Luzon ug Mindanao alang sa national finals nga anhi himuon sa Sugbu karong Nobiyembre 20-21 diha sa University of San Carlos (USC)-main gym. – BANAT NEWS