Mandaue hari sa ABAP National Amateur Boxing Tournament

CEBU, Philippines -  Milampos ang Team Mandaue sa pag-angkon sa overall championship sa ABAP National Amateur Boxing Tournament sa final phase niadtong miaging gabii didto sa Mandaue City Plaza Square.

Gipalagpot sa Mandaue ang kampiyon sa miaging tuig nga Team Cebu City (TCC), pinaagi sa pagkolekta og lima ka golds, tulo ka silvers ug duha ka bronzes o 42 puntos.

Salamat sa point system, nalikayan sa TCC ang pagkalagpot sa ikatulong dapit batok sa Bago City, dihang mirehistro sila og 30 puntos uban ang duha ka golds, upat ka silvers ug lima ka bronzes, samtang ang Bago adunay 2-4-1 gold-silver-bronze medal tally o 17 puntos.

Nakatangag usab og duha ka bulawan ang Tagbilaran, samtang ang Bacolod adunay duha ka golds ug usa ka silver ug ang Samar adunay usa ka silver.

Ang Maasin ug Sagay adunay tagtulo ka bronze medals, samtang ang Matalum ug Boracay nagbitbit og usa ka bronze. (BANATSPORTS)