Pinoy boxers mangapukan sa "Pinoy Pride"

CEBU, Philippines - Wala maghisgot og knockout sila si former two-time world champion Luis Alberto 'El Demoledor' Perez ug welterweight knockout artist Bladimir 'Vibora' Hernandez, apan ang duha ka langyaw'ng boksidor malaumon nga mouli sa ilang tagsa-tagsa ka nasud nga magmadaugon batok sa ilang mga kaatbang gikan sa nabantog nga ALA Boxer Gym.

Si Perez (26-4, 17KOs) makigsangka batok ni ALA bantamweight star AJ 'Bazooka' Banal (22-1-1, 18KOs), samtang si Hernandez (18-3, 16KOs) makigbinukbukay ni Top Rank warrior Mark Jason Melligen (19-2, 13KOs) sa eksplosibong "Pinoy Pride" boxing extravaganza karong Sabado diha sa Waterfront Cebu City Hotel and Casino.

Ang Nicaraguan bomber nga si Perez niabot dinhi sa Sugbu niadtong Domingo uban sa iyang trainer nga si Luis Reynaldo Mendoza ug maneyder niining si Mario Antonio Garcia Fonseca, samtang si Hernandez nga giubanan sa iyang trainer nga si Victor Hugo Cedillo Correa miabot niadtong Lunes.

Bisan og gikan pa siya sa tulo ka sunod-sunod nga kapildihan batok sa mga elite bantamweight boxers nga naglakip ni IBF bantamweight king Joseph Agbeko sa South Africa, wala kini nagpasabot nga motiklop usab siya batok ni Banal.

Ang walhong boksidor nagkanayon nga gipangandaman gyud niya ang maong away ug daku ang iyang kompiyansa nga sa iyang mga paningkamot makapupo kini og maayong bunga.

“Di ko mosaad og knockout, apan akong masulti nag-train og maayo, Nakahuman ko og 100 ka rounds sa sparring batok sa mga left handed nga boksidor ug misulong ako dinhi para modaog,” matud pa ni Perez atol sa press conference kagahapon didto sa Maya Restaurant sa Banilad.

Mao usab og baruganan ang manager ni Perez nga si Fonseca, kinsa namahayag nga miabot sila sa Sugbu dala ang misyon nga modaog aron mabuhi ang kahigayonan ni Perez alang sa laing world title fight.

“Gikan pami sa pikas bahin sa kalibutan og wala mi nianhi aron makighigala, mianhi para mudaog,” matud pa ni Fonseca. “Akong isegurado ninyu nga si Perez na ang labing kusgang makontra ni Banal.”

Sama ni Perez, wala usab nanganti si Hernandez nga tumbahon si Melligen, apan iyang pahimuslan kun makakuha siya og oportunidad.

Kun gipasigarbo ni Melligen nga naka-spar niya si Floyd Mayweather, Jr., naka-spar usab ni Hernandez ang rising junior middleweight prospect Saul 'Canelo' Alvarez.

Ang tanang protagonista sa "Pinoy Pride" nga gipasiugdahan sa ALA Promotions ug ABS-CBN Sports, mag-abot sa labing unang higayon sa final press conference ugma diha sa Waterfront Cebu City Hotel and Casino.

Ang official weigh-in karong Biyernes diha sa Atrium sa SM City-Cebu. (BANAT NEWS)