Kontra ni Banal moabot na

CEBU, Philippines - Moabot na karong adlawa dinhi sa Sugbu ang kontra ni ALA Boy AJ 'Bazooka' Banal nga si two-time world champion Luis Alberto 'El Demoledor' Perez.

Ang Nicaraguan gitakdang moabot sa Mactan Cebu International Airport karong alas-2 sa hapon luwan ang PAL flight PR 0861. Uban ni Perez ang iyang trainer nga si Mario Antonio Garcia Fonseca ug manager Luis Reynaldo Mendoza.

Ang duha ka protagonista maoy main event sa "Pinoy Pride" boxing promotions karong Oktubre 30 diha sa Waterfront Cebu City Hotel and Casino.

Si Perez (26-4, 17KOs), maoy nagkupot sa IBF superflyweight title human niya gipukan si Felix Mechado. Milampos usab siya pagdepensa sa iyang bakus sa makatulo ka higayon batok nila ni Luis Bolano ug Russian bomber Dimitri Kirilov.

Gilihian usab og daog si Perez sa iyang away sa bantamweight division, diin iyang gilangkat ang IBF bantamweight belt gikan ni Genaro Garcia, kinsa iyang gipalukapa sa seventh round. 

Gawas ni Perez, laing mga langyaw'ng boksidor nga moaway sa “Pinoy Pride” mao si Bladimir 'The Blade' Hernandez sa Mexico nga moharong ni   Mark 'Mighty' Melligen ug Thai Sapapetch Sor Sakaorat, kinsa mosukod sa abilidad sa batan-ong lightweight prospect nga si Jason Pagara. (BANATSPORTS)