"Pinoy Pride" public workout sa SM

CEBU, Philippines - Ang mga bida sa "PINOY PRIDE" boxing card nga hiniusang gipasiugdahan sa ALA Promotions ug ABS-CBN Sports, mopakita sa ilang kaandam sa away atubangan sa mga Cebu boxing fans sa ilang public workout karong Sabado sa hapon diha sa SM City-Cebu.

Si WBO Asia Pacific bantamweight champion AJ 'Bazooka' Banal, kinsa moharong ni two-time world champion nga si Luis Alberto Perez sa Nicaragua, maoy mangulo sa mga Pinoy boxers nga mopahigayon og public workout.

Magpasingot usab atubangan sa gatosan niya ka mga fans didto sa Atrium sa SM City si welterweight prospect ug Top Rank boxer     Mark 'Mighty' Melligen. Si Melligen mopahigayon sa iyang homecoming fight dinhi sa Sugbu batok ni Mexican knockout specialist Bladimir 'The Blade' Hernandez.

Gawas sa mga local trainers sa ALA Gym, ubanan usab si Melligen sa iyang

chief trainer nga si Tony Martin.

Uban usab si Banal ug Melligen sa ilang mga stablemates nga sila si undefeated Jason Pagara ug knockout sensation Larry 'Bon Jovi' Canillas.

Ang upat ka ALA boxing stars laraw nga moharos sa ilang mga kaatbang sa PINOY PRIDE karong Oktubre 30 diha sa Waterfront Cebu City Hotel and Casino.

Ang mga tiket mapalit sa ALA Promotions Office sa tel. no. (032) 2364611, ALA Boxing Gym sa BTC (032)4162011, USA Sports Boutique-Ayala Center Cebu (032) 4121069, Bisaya Ispisyal Boutique-Ayala (032) 2312676 ug sa Waterfront Cebu City Hotel and Casino (032) 2326888. – BANAT NEWS