CEBU, Philippines - Nangahas si Albert Pagara, ang manghod ni lightweight prospect Jason Pagara nga mosunod sa iyang lakang dihang moharong kini batok ni Reoxyl Tabogon sa Summit Fight Night Amateur Series karong gabii diha sa Gaisano Countrymall carpark sa Banilad, ning siyudad.
Si Pagara, produkto sa nabantog nga ALA Gym, moharong sa iyang teammate sa Team Mandaue nga si Tabogon agi'g pagpangandam sa nagsingabot nga ABAP regional tournament karong Oktubre 26 diha sa Mandaue City Sports Complex.
Gawas nila ni Pagara ug Tabogon, mo-away usab sa maong boxing card ang tibuok line-up sa Team Mandaue nga naglakip nila ni Robert Labanza, Robert Etorma, Melvin Besinga, Elecio, Taruc, Christian Bacolod, Ferde San Roque ug Kevin Jake Catajara.
Ang Phil-Aust Gym, mopadala sab og duha ka boksidor nga sila si Richard Casenillo ug Rodel Wenceslao.
Ang pambato sa Florencio Urot National High School nga si Reyboy Pepito mopakita sab sa iyang abilidad sa panuntok.
Mopakita usab sa ilang katakus ang mga bisitang boksidor nga sila si Richard Barrios sa Bais City ug Haybon Hondos sa Davao City. (BANATNEWS)