CEBU, Philippines - Unang nimina og bulawan si Joseph Camingao alang sa Team Visayas pinaagi sa century dash event sa 2nd Milo Little Olympics National Finals kagahapon didto sa Don Gregorio Pelaez Sports Center track oval sa Cagayan de Oro City.
Ang 12-anyos nga sprinter nahimong labing kusog sa boys elementary division human maghari sa 100m event uban sa oras nga 13.14 seconds. Napun-an pa ang iyang nakabkab nga bulawan human nidominar sa 110m hurdles sa oras nga 18.83 seconds
Si Kenneth Virgyll Monzon maoy mi-okupar sa ikaduhang dapit sa 100m event sa oras nga 11.62 seconds, gisundan ni Jerwin Ebcas sa iyang 11.40 seconds. Si Roy Villahermosa mitapos sa 110m hurdles uban ang silver medal sa oras nga 16.16 seconds, sunod ni Mark Rabanon sa Luzon nga adunay 16.12 seconds.
Ang National Capital Region (NCR) mipakita sab sa ilang kusog pinaagi sa pagkabkab og tulo ka bulawan kortesiya nilang Vanessa del Valle sa (800m (2:23.34 sec) ug Michelle Palmares sa 100m (12.64 sec) sa secondary division, samtang si Justine Urbano miangkon sa elementary divison title sa 13.93 seconds.
Sa laing bahin, ang Team Visayas secondary athletes mihakot og lima ka bulawan kortesiya nilang Daisy May Lawas ug Roy Villahermosa sa 400m hurdles, Jersell Cabatino ug Earl Salinas sa high jump ug Mary Ann Mabansag sa 100m dash. (BANATNEWS)