CEBU, Philippines - Walo ka koponan nga bitoonan sa mga commercial veterans ug kanhi collegiate standouts ang magtigi sa Open division sa 1st Mayor Teresa P. Alegado Fiesta Cup Basketball League didto sa Consolacion Sports Complex.
Lakip sa mga title contenders sa duha ka semana nga torneyo mao ang University of San Carlos (USC) Warriors nga gipangulohan ni Paul Joven, Southwestern University (SWU) Cobras ni team manager Ryan Aznar ug University of Cebu (UC) Alumni.
Atngan sa USC mao ang batman-and-robin tandem nila ni Enrico Llanto ug Niño Ramirez, samtang ang SWU Cobras moparada sa orihinal nilang line-up nga miduwa sa 10th Cebu Schools Athletic Foundation, Inc. (CESAFI).
Mokompleto sa koponan nga moduwa sa maong torneyo mao ang KNF Design ni Engr. Nilo Ferraren, CIW Forwarders ni Brgy. Capt. Emmanuel Wagas, Mandaue Landmasters ni Eugene Andaya, Ave Maria Sanctuary Park ni Engr. Raffy Senining ug ACES ni coach Al Solis.
Gipahibalo ni league commissioner Paul Alelu Q. Flores, nga ang makampiyon sa torneyo nga mosubay'g double round robin format, mobulsa og P50,000 nga ganting salapi.
Gisuportahan nila ni executive chairman Julius Alegado ug sports director Nilo Ferraren, ang liga magsilbeng highlights sa tinuig nga kapistahan sa ilang mahal nga patron San Narciso. – BANAT NEWS