Rollway midemolis sa Einsa sa Lapu-Lapu Fiesta Cup

CEBU, Philippines - Gipanitan sa Rollway Freighters ni team owner Rolly dela Pieza ang Einsa, 98-78 sa Open C division sa 2010 Lapu-Lapu Fiesta basketball tournament didto sa Lapu-Lapu City gym.

Kompas pa ang duwa sa Rollway pagsugod ug mao kanunay ang naglabaw. Sa tanto nilang paningkamot mitubo og maayo ang ilang labaw hangtod nga nahurot ang oras sa ilang duwa. Laktod nga pagkasulti, gikontrolar sa Rollway ang kinatibuk-ang duwa.

Si Tarona maoy topscorer sa Rollway nga mibugha og 20 puntos, gisundan nilang Morata ug Tabalok nga mihakot og 15 puntos matag usa ug Orly Amores nga midiskarga og 12 puntos.

Ang pilderong Einsa gipangulohan sab ni Codero, kinsa miratsada og 23 puntos, apan nakawang lang ang iyang mga paningkamot kay wala kini makapadaog sa iyang koponan. Sila si Tampus ug Gaguindangan nagkumboya'g 26 puntos sa ilang kapildihan.

Ang torneyo nga gipasiugdahan ni Lapu-Lapu City Councilor Harry Radaza, usa sa mga dagkung kalihukan sa tinuig nga kapistahan sa ilang mahal nga patron Birhen sa Regla karong Nobiyembre.

Puntos Matag Usa

ROLLWAY (98) - Tarona 20, Morata 15, Tabalok 15, Amores 12, Berido 8, Amistad 8, Augusto 6, Sanchez 6, Palad 4, Ochea 4

EINSA (76) - Codero 23, Tampus 16, Gaguindangan 10, Peliño 7, Ybañez 6 Paraja 5, Guadalquiver 5, Calvo 4. – BANAT NEWS