2-0, tuyo sa UC, CEC

CEBU, Philippines - Human katihi og 72-66 nga kadaugan sa Game-1, tinguha sa University of Cebu (UC) Webmasters nga makakuha’g 2-0 nga bentaha batok sa nine-time champion University of the Visayas (UV) Green Lancers karong gabii sa Game-2 sa ilang "best-of-five" championship series aron magkaduol sa ilang damgo nga molangkat sa labing unang korona sa Cebu Schools Athletic Foundation, Inc. (CESAFI) basketball tournament collegiate division diha sa Cebu Coliseum.

Samtang sa laing bahin, tinguha sab karon sa Cebu Eastern College (CEC) Dragons nga makatukob sab og 2-0 nga abante batok sa Sacred Heart School-Ateneo de Cebu (SHS-AdC) Magis Eagles alang sa secondary division.

Sa higayon nga modaog ang UC karon, sila maoy bugtong team nga mo-iskor og sagunson nga daog batok sa UV Lancers sa kasaysayan sa finals. Kun masuwertihan og mahimong kampiyon, sila maoy ikaduhang team nga modaog sa korona ug ilang pakanuogon sa trono ang Lancers, kinsa nidominar sa CESAFI sud na sa siyam ka tuig. 

Pag-usab sa kasaysayan sa CESAFI mao sab ang tuyo sa Dragons, kinsa nagkaduol na sa labing una nilang kampiyonato batok sa Magis Eagles nga wala sab damhang mo-abante sa finals ug nagtinguha sab pagkulit og kaugalingong school record.

Ang Dragons nakauna dihang ilang gipanitan ang Magis Eagles, 88-70 niadtong Huwebes.

Bisan asa kanilang duha tali sa CEC ug SHS parehong nangita’g kasaysayan tungod kay pareho sab silang mga first-timer sa CESAFI finals.

Si Junemar Fajardo, kinsa dili malalis nga maoy labing iladong collegiate player ug maoy pinakalantip nga hinagiban sa Webmasters, lisud kaayong pugngan sa undergoal. Ang 6-foot-9 center nagkinahanglan sab og suporta nilang Edward Pao, Kelvin Juliane, Quinton Brian Heruela, Robinson Mohammad ug Luigi Bercede.

Sa laing bahin, ang Lancers kinsa wala pa mapilde og sunod-sunod nga duwa sa finals, mosalig nilang Adrian Lao, Harold Cincoflores, Phil Mercader, Ralf Olivares ug Eman Calo ug mangayo sab sila og suporta nilang Rene Jun Saycon ug Andrew Avillanoza.

Sama sa gihapon, ang Dragons magsandig sa abilidad nilang Nike Montalvo, Roy Villarias, James Neil Sumayang, Benjamin James Zosa ug Mark Olayon, samtang ang Magis Eagles kinsa tinguhang mobawos moparada nilang Adrian Roland Muller, Adven Jess Diputado, Bradely Bacaltos, Henry Renzal Asilum, Julius Salvador Cadavis ug Dawn Henric Ochea. – BANAT NEWS