MANILA, Philippines - Isang nagdedepensang kampeon laban sa isang koponang huling umabante sa isang championship series noong 2008.
Magtatagpo ang nagtatanggol sa titulong San Sebastian College-Recoletos at Jose Rizal University ngayong alas-2 ng hapon sa stepladder phase semifinals ng 86th NCAA men’s basketball tournament sa The Arena sa San Juan City.
Ang mananalo sa labanan ng No. 2 San Sebastian at No. 3 Jose Rizal ang siyang makakaharap ng No. 1 San Beda College sa isang best-of-five championship series.
May 1-0 abante na ang Red Lions sa nasabing serye bilang insentibo matapos kunin ang outright finals berth mula sa kanilang 16-game sweep sa elimination round.
Bago makasagupa ang Stags, kinailangan muna ng Heavy Bombers na igupo ang No. 4 Mapua Cardinals, 60-54, noong Miyerkules.
Ipaparada ng San Sebastian sina 6-foot-2 power forward Calvin Abueva, Ronald Pascual, Pamboy Raymundo, Gilbert Bulawan at 6’6 Ian Sarangay.
Muli namang aasahan ng Jose Rizal sina 6’7 Cameroonian import Joe Etame, John Njei, PBA-bound Marvin Hayes, John Lopez at Alex Almario.
“Kailangan talaga namin mag-double ng effort laban sa San Sebastian,” wika ni rookie coach Vergel Meneses sa kanyang Heavy Bombers.
Huling nagkampeon sa NCAA ang Mandaluyong-based cagers noong 1972 sa likod ni Philip Cezar.