Surban misidlak sa Talisay M'bike Challenge

CEBU, Philippines - Lab-as pa sa iyang malampusong kampanya sa Asian Mountainbike Championships didto sa South Korea, miani na usab og laing daog si Niño Surban sa 1st Talisay City Vice Mayor Alan Bucao Mountainbike Challenge didto sa Brgy. Lagtang, Talisay City.

Mipatigbabaw ang kapaspas ni Surban aron makuha ang top place batok nila ni Randy Carbonera ug Albert Basirgo sa ikaduha ug ikatulong dapit.

Namawi hinuon sa kapildihan sa iyang igsuon si Rey Carbonera pinaagi sa pag-angkon sa junior-beginner class bisan pa sa presensiya sa mga lig-ong kaatbang sama nila ni Elmer Navarro ug Jezam Baldomar.

Si Ramon Espinosa mao ang nidominar sa veterans class batok nila ni Junasis Alicaway ug Nilo Barbalose, samtang si Roman Suplig nanghawod sa executive division human niya gipilde silang Toto Lim ug Albert Paraiso.

Sa downhill event, si Carlos Russell mao ang miangkon sa titulo human niya gitapos ang rota sud sa usa ka minuto ug 46.23 segundos. Gisundan ni Dongkey Sanchez, kinsa nauwahi og 20 segundos, samtang si Zandro Fajardo mitugpa sa ikatulo sa oras nga 49.88.

Wala hinuon magmahay si Fajardo gumikan kay iyang giharian ang intermediate class sa oras nga 1:50.38. Si Lex Lopez mipuwesto sa ikaduha sa oras nga 1:53.22, gisundan ni Victor Bagano sa oras nga 2:00.55.

Si Eusebio Ravanes, Jr. maoy naghari sa beginners class sa oras nga 1:50.20, samtang sila si Maximo Villarta, Jr. (2:00.70) ug Julius Amigable (2:05.21) maoy mi-okupar sa ikaduha ug ikatulo nga dapit. – BANAT NEWS